Kasayoran kini nga gihatag sa naggamit sa cell. no. 0910-8597655 (Sent: 05:25:50 pm--June 13, 2008). Makapahisagmuyo kini alang niadtong miapil sa raffle promo nga gipasiugdahan sa usa ka produktong energy drink kay dili man diay tanang entries maapil sa raffle.
Sumala sa atong texter, kining maong raffle promo gipasiugdahan sa usa ka energy drink powder. Ang collector sa mga entries gayod kuno ang mibutyag ngadto sa atong texter nga daghang entries sa raffle promo nga anha ra sa bodega taman!
Pangdaoban ra diay ang maong mga entries ug dili maapil sa raffle draw. Mitug-an kuno ang collector sa entries ngadto sa atong texter nga pilion ra nila ang dad-on nga entries aron iapil sa raffle.
Matud pa sa collector sa entries, ang kasagaran nga modaog mao kadtong mga kabanay sa mga tawong may koneksiyon sa kompaniya. Mao kuno kini'y nahitabo sa nahaunang mga pagbola.
"Karon naa na say raffle draw nila. Daghan na pod nga mga entries ang makaluluoy kay daoban ra," nagkanayon ang atong texter.
Kun mabasahan kini ni bisan kinsang tawo nga konektado sa kompaniya sa energy drink nga nagpasiugda og promo, tingali makasabot sila nga silay gipasabot sa atong texter kun silay nagbuhat sa ingon.
Dili ni namo sala nga among nasayran kining maong binuang kun tinuod man nga naghimo kamog ingon niini. Maoy sudyai ninyo ang inyong collector sa entries nga maoy nibutyag sa inyong sekreto!
Bitaw, angay sab ning imbestigahon sa DTI. Dili maayo nga magpadayon kini kun tinuod man kining tinontoha kay maisip kining pangilad ngadto sa mga pumapalit sa ilang produkto!
* * *
"Good day, Sir. Bahin kini sa NFA. Dunay baligya diri sa Asturias pero dili man nila ibaligya og tarong. Tag duha ra ka kilo ang among mapalit pero kun naay mopalit og usa ka sako ilang baligyaan. Unsa man ning ila?" -- 0926-35635558 (Sent: 05:42:35 pm--June 14, 2008)
Morag nanimaho nang anomaliya. Maayo untag masusi kini sa kadagkoan sa NFA!
(Sumbong ug reklamo? Text sa 0910-8105522)