Hangin ray mogawas

May nakahatag nako’g impormasyon nga adunay daghang habal-habal drivers karon nga mas mopabor sa binotelya nga gasolina kay sa gasolina nga paliton nila gikan sa gasoline station.

Nadiskobrehan man god kuno nila nga adunay daghang gasoline station karon nga bisan hangin ray mogawas sa ilang pump, mokuwenta na ang ilang iphanan sa gasolinang gitubil. Alkanse kuno sila.

Whereas sa binotelya, maseguro nilang usa ka litro gyud ang ilang mapalit nga gasolina kay gitakos man kini sa pagsukod pinaagi sa pagsulod niini sa botelya nga mosulod og usa ka litro.

Dili ba maisip nga panikas sa ginagmay’ng paagi kining nadiskobrehan sa atong kaigsuonan nga may mga gas station nga mokuwenta na ang ilang iphanan bisan hangin ray gibuga sa ilang pump?

Angay ning susihon. Angay ning sutaon kun unsa kini ka tinuod.

* **

Ang naggamit sa cell. no. 0910-6330298 mi-text nako niadtong Agosto 18, 2008 (Sent: 08:13:08am) aron pagpadangat sa iyang concern. Sumala sa iyang text, adunay police nga na-assign diha dapit sa may Metro Mandaue nga kusog manguwarta.

Sumala sa atong tipster, koleksiyonan sa maong polis ang mga dispatcher, sidewalk vendors ug drivers og tag P20. Unsa man kini ka tinuod? Tulibagbag kaayong pamation kun tinuod man ugaling kini.

Angayang subayon sa immediate superior sa maong polis ang iyang binuhatan. Aksiyoni...!

* * *

Ang naggamit sa cell. no. 0918-7309288 mi-text nako (Sent: 09:42:36am -- August 18, 2008) nga dunay dakong kompaniya sa Bohol nga nanag-iya’g dept. stores nga wala mosubay sa gilatid sa balaod mahitungod sa pagpatuman sa minimum nga suweldo.

Ang atong texter nag-ingon nga 15 ka tuig na siyang nagtrabaho sa maong kompaniya apan ang iyang rate wala makaabot sa minimum. Haskang paita!

* * *

(Sumbong ug reklamo? Text sa 0910-8105522)