"Good day, Sir. Naa lang koy ipahibalo sa publiko. Nakamatikod man god ko pagsakay nako sa jeep de pasaheroan nga naay mga tawong mosakay, mga lalaki nga dagko kaayo og mga bag nga walay sulod. Akong nasiplatan ang usa nga nagdalag bag nga nagsigeg lihok, wala mahimutang. Naghuot man god ang jeep nga akong gisakyan. Ang iyang kamot gipailawom sa iyang bag. Pagkataudtaod nanganaog sila. Diha gyoy pasahero nga nakuotan nila. Kadaghan na gyod ko makabantay og ingon ini sulod sa jeep. Aware lang unta tang mga pasahero aron dili ta mabiktima sa ilang modus operandi." -- 0915-4411001 (Sent: 09:53:25am--July 25, 2008)
Daghang salamat sa imong pagpaambit sa imong kasinatian ug pagpahimangno sa atong kaigsuonan, higalang texter. Hinaot nga magsilbi kining epektibong pahimatngon aron dili sila mabiktima sa modus operandi sa mga badlongon sa katilingban.
* * *
"Good day, Sir. Diri ni sa Bohol. Bahin sa panubig sa among lugar sa Lourdes, Cortes, Bohol. Di makagamit ang mga lumolupyo nga naa sa ibabaw sa parte sa lugar kay tua man sa ubos ang reservoir. Segurista ang mga namunuan sa barangay. Komo tua man silang tanan namuyo sa ubos nga lugar, wa na lang nila hunahunaa ang taga ibabaw." -- 0920-3813128 (Sent: 08:46:00am--July 26, 2008)
Dili lang una ko mokomentaryo mahitungod niini. Hatagan nakog higayon ang mga brgy. opisyal sa Lourdes, Cortes, Bohol sa pagpasabot sa ilang habig. Bukas kining lindog sa ilang reaksiyon.
Alang sa atong texter, akong isugyot nga kamong nagpuyo sa "ibabaw" mopadangat og hiniusang reklamo ngadto sa inyong brgy. officials.
* * *
Mamahaw sa Chowking, maniudto sa Jollibee ug manihapon sa Colon Night Market. Mao kiniy akong buhaton sa higayon nga mahasuroy ko sa downtown sa dakbayan sa Sugbu.
Sa akong obserbasyon, buhi na ang gabii sa Colon gumikan sa gihingusgan nga Colon Revitalization Project. Ang nakanindot pa gyod kay dunay daghang mga bantay o guwardiya batok sa mga badlongon sa katilingban.
(Sumbong ug reklamo? Text sa 0910-8105522).