Daghan bang mga tawo ang motan-aw og sine karon?

Sa dekada 1950, 1960, 1970, 1980 ug 1990 sikat kaayo ang atong mga sinehan alang sa kalingawan ug sa lulinghayaw ilabi na sa adlaw'ng Domingo.

Kasagaran ang pulta kaniadto tag-bayente sentabos ra kun may dobol ug otsenta e singko sentabos sa gitawag nga first-run theaters.

Sikat kaniadto sila si Fernando Poe Jr., Romeo Vasquez, Joseph Estrada, Jess Lapid, Amalia Fuentes, Susan Roces, Divina Valencia, Max Alvarado, Paquito Diaz, Cesar Ramirez ug uban pa.

Sa salidang iningles, sikat usab si Gordon Scott, Steeve Reeves (Hercules), Yul Bryner, James Bond, Alen Delon, Charles Bronson, Bruce Lee, Shoji Karada ug Chen Xing. Dili usab nato hikalimtan si Franco Nero, Steve Mcqueen, Clint Eastwood ug Sean Connery (James Bond 007).

Migawas ang Betamax kanidtong 1980's. Apan sa wala madugay, nawagtang ang Betamax ug nanghawod ang VCD player, DVD, music component ug uban pa.

Ang atong mga katawhan karon, magsige na lang og tan-aw sa salida sulod sa ilang panimalay ilabi na gyud kun adunay 'pirated' tape nga wala pa ikapasalida sa atong mga sinehan.

Karon, daghan pa bang mga tawo nga motan-aw sa sine? Ang tubag niini mao nga sigon pa sa survey diyotay na lang ang motan-aw sa sine.

Tungod kay midagsang karon ang VCD player, DVD ug mga colored tv pa. Dili sama kaniadto nga hawod kaayo ang mga sinehan, radyo ug juke box.

Apan karon, lahi na. Ang mga sinehan kaniadto linya-linyahan sa mga katawhan usahay gani magtinukmoray pa. Kun mapawong o maundang gani ang salida sa makadiyot lang nga higayon, maniyagit dayon ang mga nanan-aw ug uyogon pa nila ang mga lingkoranan.

Ug mag-ambahan sa pagsinggit 'Uli bayente sentabos!' Karon, ang mga sinehan mingaw kaayo kay diyotay nalang ang mga tumatan-aw. Di ba?