Tabang way sama

Iloilo City, Iloilo — Nahuwasan ming nakaabot dinhi. Nabuntog namong tanang kakulian sa tibuok adlaw nga panaw paingon ning makaluluoyng destinasyon. Nga maoy labing nagusbat sa bagyong Frank. Sa kataposan, natuman nang among saad pag-apud-apod sa mga hinabang ngadto sa mga biktima, bisan unsa pa kalayo ang ilang nahimutangan.

Kadlawon pang dako ming nanggikan sa ABS-CBN Broadcast Complex sa Jagobiao, Mandaue City uban sa tulo ka dagkong trak nga puno sa mga hinabang sa mga Sugbuanon. Nalatas namong tulo ka isla sa tulo ka lalawigan sa duha ka rehiyon sud sa 13 ka takna. Di na batan-on ang among mga lutahan. Apan ang abundang mithi sa kamanggihatagon nga gisabod sa matag dangaw sa among agianan maoy nakapalahutay sa among kapiskay.

* * *

Human sa lisod tuohan nga gidaghanon sa mga hinabang ug sa mas lisod tuohan nga kapaspas sa ilang pagpangabot, wa mahunong ang init ug lapad nga pagtabang nga among nadawat. Nga maoy nakapagaan ug nakapasayon sa labing bug-at ug lisod nga bahin sa bisan unsang relief campaign—ang paghipos, pagpamutos, paghakot ug pag-apud-apod sa mga hinabang.

Gikan sa pinahuwaman nga mga trak paingon sa amihanang Sugbo ug libreng barko paingon sa isla sa Bantayan, wa pa mahurot ang among mga gasa. Dihang hapit na mi motahan sa kalisod pagda sa tanang hinabang nganhi sa kasadpang Kabisay-an, nakadawat mi sa talagsaong tanyag nga mga trak nga pahuwaman sa mga tag-iya nga nipasalig pag-abaga sa tanang gasto sa krudo ug barge, apil nang pagkaon sa mga boluntaryo, puno sa ilang kaugalingong mga kargador.

Silay hinungdan nga nakataak mi dinhi.

* * *

Duha na ka buwan human sa bagyo, ang mga biktima nagkurog pang niasoy sa ilang kalisang sa paspas nga pagtubo sa baha hangtod nga nitupong sa ilang mga atop. Nga maoy nakapugos nila pagbakwet bisan sa kaataon pa sa kangitngit sa alas-dos sa kadlawon.

Wa kapugngi ang paglugmaw sa ilang mga luha pagkahibawo nga ang mga hinabang nga ilang nadawat gikan sa mga Sugbuanon. Nga bisan sa kalayo nibati sa ilang kasakit sa nagusbat nga kabtangan ug pagbangotan sa nakalas nilang kaparyentihan.

* * *

Ang labing makapatandog nga bahin sa among panaw mao ang way pupanaganang pagtabang sa mga tawo, bisan sa mga wa kaila namo, human nahibawo sa among katuyoan. Apil nang 10% nga diskuwento sa E.B. Aznar Shipping Corp. sa barge gikan sa Tabuelan paingon sa Escalante ug 20% nga diskuwento sa Tri Star Mega-Link Corp. sa barge gikan sa Bacolod paingon sa Dumangas.

Palaran sab ming nakasugat sa matinabangong mga Sugbuanon: Sakop sa coast guard sa Escalante; cashier sa pribadong terminal sa pantalan sa Bacolod nga taga Canduman, Mandaue; ug taga Mabolo ug taga Minglanilla nga mga tripulante sa LCT Sto. Niño Navistar.

* * *

Email:   [email protected]