Nagpadayon diay gihapon hangtod karon ang text scam. Niining bag-o lang, akong higala ang hapit mabiktima.
Dunay nag-text niya og congratulatory message. Gipatuo siya nga ang iyang SIM card nakadaog og P700,00 sa 3rd anniversary (kuno) sa pre-raffle nga gihimo niadtong Mayo 16, 2008 sa Millionaires Club, Inc.
Alang kuno sa dugang impormasyon ug mga detalye, patawagon ang akong higala sa contact number ni R.A.A. Pero imbes kang R.A.A. siya mo-contact, akoy gipahibalo sa akong higala sa text scam nga iyang nadawat.
* * *
Nagtuo ko nga nag-name-dropping lang ang mga badlongon sa katilingban sa pagpasalir sa ilang tinonto. Gigamit lang nila ang ngalan ni R.A.A. ug ang Millionaires Club, Inc. aron kunohay mahimong kredible ang ilang pagpangilad. Pagbantay kamo niining maong estilo sa modus!
* * *
"Good day, Sir. Concern citizen lang ko. Diri sa Toledo City dili na safe maglakawlakaw kay daghan na kaayong mangilad ug manulis bisan adlaw. Akong friend usa ka hapon niana sa may merkado gidul-itan og kutsilyo ug giingnan siya nga TULIS! Sa iyang kakuyaw gihatag dayon niya ang iyang kuwarta nga P300 . Maayo untag magpatrolya ang kapolisan aron masumpo ning problemaha sa Toledo." -- 0926-8341097 (Sent: 10:21:02am--May 27, 2008)
* * *
Maayo sab unta kun gipa-blotter ninyo ang maong hitabo ngadto sa buhatan sa kapolisan aron mahimo kining usa sa daghang basehanan nila sa pagpahugot sa ilang kampanya batok mga mangingilad ug tulisan.
Atensiyon, Toledo PNP!
* * *
"Sir, naay pagpangawat og kuryente ug suyopanan og drugas kilid gyod sa simbahan sa Blessed sa Villagonzalo 2." -- 0910-6106519 (Sent: 12:36:03pm--May 27, 2008)
* * *
Salamat sa impormasyon nga imong gihatag, higala. Angay ning susihon sa proper authorities.
Nagtuo ko nga ang VECO angay sab magsusi bahin ining gikataho sa atong texter nga may pagpangawat og kuryente diha sa may Villagonzalo 2.
Ang kapolisan ug brgy. tanod angay sab magpakisusi kalabot sa giingong suyopanan og drugas sa nahisgotang lugar.
Gikinahanglan ang dinaliang aksiyon!
(Sumbong ug reklamo? Text sa 0910-8105522)