NAKARATING sa kaalaman ng aking panganay na anak na si Senate President Pro Tempore Jinggoy Ejercito Estrada ang problema ng Philippine Association of Services Exporters Inc. (PASEI) tungkol sa bagong patakaran ng Saudi Arabia sa pag-hire ng mga OFW.
Ang PASEI, na pinamumunuan ni Mr. Victor Fernandez ay samahan ng mga manpower placement agency na 28 taon nang nagde-deploy ng Pilipino workers sa iba’t ibang bansa at sa kasalukuyan, meron silang direct business relationship sa Saudi employers.
Pero base sa bagong “unified contract” na inaprubahan umano ng Saudi Minister of Interior at ipatutupad ng Saudi National Recruitment Committee simula Set. 1, 2008, ang naturang direct business relationship ay hindi na papayagan at sa halip ay magiging kasama na sa mga transaksyon sa OFW recruitment ang mga Saudi recruitment agency.
Ayon sa PASEI, ang bagong sistema ay mangangahulugang magkakaroon pa ng third party sa OFW recruitment sa Saudi, at dahil dito, madadagdagan ang gastos at nakukunsumong panahon sa recruitment procedures sa naturang bansa.
Binigyang-diin ng PASEI na maganda naman ang kasalukuyang direct business kaya’t walang dahilan para palitan ito.
Nais ng PASEI na pangunahan mismo ng mga Saudi employer ang paghiling sa kanilang pamahalaan na huwag ituloy ang “unified contract”.
Pansamantala anila ay dapat hilingin ng Philippine Overseas Employment Administration, Department of Labor and Employment at Department of Foreign Affairs sa Saudi government na ipagpaliban muna ang implementasyon ng “unified contract” upang matalakay na mabuti ng mga maaapektuhang sektor.
Si Jinggoy, na chairman ng Senate Committee on Labor, Employment and Human Resources Development at ng Joint Congressional Oversight Committee on Labor and Employment, ay naniniwalang may malaking epekto ang Unified Contract sa mga OFW, gayundin sa mga manpower placement agency at sa kabuuang overseas employment industry, kaya dapat munang pag-aralan at pag-usapan ang bagay na ito.