Reproductive bill kinopya

Gisaway sa simbahang katoliko ug mga pro-life ang consolidated reproductive bill nga nag-ung-ung karon sa ubos balay balauranan tungod kay matud pa nila nagdasig lamang kini sa sex, abortion ug uban pa.

Si Dr. Rene Josef Bullecer sa human life international mipasangil nga ang tumong sa maong balaudnon dili alang sa pagkontrolar sa gidaghanon sa populasyon kun dili alang sa pagpalambo sa mga negosyante ug mamohatay og contraceptives. Ang maong balaudnon gipalabang dili tungod kay naghinubra na ang populasyon sa nasud kun dili tungod sa atong  obligasyon sa kasabotan nga atong giapilan didto sa gawas sa nasud. Mao ni ang hinungdan nga gikopya lang sa mga kongresista nga nagduso niini ang maong balaudnon sa unsa mang nasabutan sa gawas sa nasud. Hastang ahaka kun tinuod ning pasangil ni Dr. Bullecer. Nangodigo diay ang atong mga kongresista nga nagduso sa reproductive bill.

* * *

Pagkaluoy tawon ni Kongresista Benhur Salimbangon daw iro nga mibahag ang ikog sa dihang gihulga sa simbahang katoliko nga di pakalawaton gumikan sa iyang pagpirma isip co-author sa reproductive bill. Ang Kongresista human makigkita ni Msgr. Boy Alesna ug Msgr. Achiles Dakay makigkita pa gayod ni Cardinal Vidal aron iyang ipasabot niini nga ang iyang pagpirma sa balaudnon isip co-author wa magpasabot nga miuyon siya niini kun dili mipirma lang kuno siya aron malantugi-an ang balaudnon. Mao ba kongresman?

* * *

Human mabasa ang akong lindog kaniadtong Martes mahitungod sa Mactan North Reclamation and Development Project sa dakbayan sa Lapulapu usa ka Oponganon ang nag-txt kanako ug mipadayag sa iyang sentimento. Matud pa niya nayabag na daw ang gobiyerno sa Lapulapu. Wa man gani kuno makatambak sa dagkong libaong sa dalan duol sa Saint Francis Funeral Parlor, ang 400 ektarya pa kahang dagat?