Gitataw ni magpapatigayon Efrain Pelaez Jr. nga wala g’yod siya’y tinguha nga mag-politiko.
Apan sa interview sa radyo, giangkon ni Mr. Pelaez nga daghan ang miawhag kaniya nga padaganon sa pagka kongresista o kaha mayor diha sa dakbayan sa Lapulapu.
Mitoo ko sa pamahayag ni assistant city engineer Michael Dignos nga kadudahan ang mga lihok karon ni Mr. Pelaez nga kunohay aktibo siya sa kampanya sa “graft and corruption” diha sa Lapulapu.
Dili g’yod imposible nga ang pagka anti-graft watch unit sa kahugpongan nga iyang gipangulohan – ang Mactan Island Chamber of Commerce – gigamit lang ni Mr. Pelaez pagpalambo sa iyang kainila.
Sublion nako nga isip sakop sa media, gidayeg nako si Mr. Pelaez nga mohimo’g lakang aron pagsumpo sa graft and corruption sa kagamhanan, apan kadudahan man god kay ang gitumbok niya kanunay mao ra man ang mayor sa Lapulapu ug ang kahigalaan niini.
Duna tuo’y uban nga mga magpapatigayon nga gihimoan niya’g lakang nga gipangayoan og dukomento gikan sa kagamhanan sa Lapulapu kun nagbayad ba ni sa husto nga buhis apan gihulagway nga pagpanggukod ra gihapon kay kakompetensya man sa iyang patigayon.
Ang usa g’yod sa basihanan nga may pagdumot ang paggukod niya ni Lapulapu City Mayor Arturo Radaza kay gihimo niya kini dihang nangusog ang mayor nga pabayron og buhis ang iyang patigayon nga giangkon niya nga dili unta angay’ng kolektahan og buhis.
Wala makaila si mayor Radaza nako, wala pa gani kami magkita sa personal sukad-masukad, apan niining puntoha ako siya nga paluyohan gawas lang kun masabot nako nga walay sambog nga “personal interest” ang gihimo ni Pelaez nga paggukod sa mayor.
Naigking man god tawon ang mga opisyal sa Lapulapu pagkadawat nila sa mga suwat ni Pelaez nga nangayo’g dukomento sa pagbayad og buhis sa mga magpapatigayon kay ang suwat duna may marka nga logo sa Ombudsman.
Dili na man unta kini kinahanglan. Ako bitaw kun mosuwat ko nga mangayo’g dukomento gikan sa mga buhatan sa kagamhanan, dili ko mogamit og “letter head” sa media outlet nga akong gitrabahoan.
Bisan og si Pelaez miingon nga wala siya’y plano sa pagsulod sa politika, dili kini dayon angay’ng tuohan. Ang gikuhaan nako og basihanan mao lagi si Senador Panfilo Lacson.
Matud ni Lacson kaniadto nga “loud” kaayo ang politika, apan gitulon man niya ang iyang gisulti. Mao na nga dili g’yod katoohan ang pamahayag ni Mr. Pelaez nga dili siya molansar og pwesto sa kagamhanan.
Aw hinoon, ang pagpasaka og kaso ni Mr. Pelaez batok ni mayor Radaza iya usab nga katungod kay nangangkon man siya nga gipaburot sa mga opisyal sa Lapulapu ang presyo sa mga gipalit nga computers.
Maayo usab nga maimbistigar ni, apan daghan lang ang nabalaka nga basin og dili na patas ang imbistigasyon sa Ombudsman kay lagi si Mr. Pelaez nga maoy nagreklamo, usa man ka anti-graft watch volunteer nga accredit sa Ombudsman.
Ang akong nahibaw-an nga subra sa P49,000 ang matag usa sa computers. Ang presyo god sa computer, magdepende man sa iyang “softwares” nga mahal kun dili mga “kinopya” ang sulod.
Dinhi sa dakbayan sa Sugbo kaniadto, duna man gani’y mga computers nga gipalit ug gipanghatag sa kabarangayan nga ang kantidad kuwang na lang og dies sentimos aron mahimong P100,000.
Ang maong kaso nga gipasaka, ako’y nagsuwat niadto, wala magsilbi ug gibasura lang sa Ombudsman.