Rice traders:  Moderate your greed!

Mireklamo ang mga namaligyag commercial rice nga na-over subsidized kuno sa gobiyerno ang pamaligya sa NFA rice. Maoy ilang gusto nga dili kuno baratohon pag-ayo ang bugas sa gobiyerno aron dili sila malugi.

Buot nilang ipasabot nga mahalon usab ang NFA rice, susama sa ilang mga presyo, aron ma-walay alternative ang katawhan, ug daghan gihapon ang mamalit sa ilang bugas nga mahal. Nga kun baratohon pag-ayo ang NFA rice, mominos ang mamalit sa ilang bugas ug maalkansi na sila. Alkansi sa ganansiya.

Pastilan sad uy.  Dili sila ka sakripisyo og gamay? Nagping-it na pag-ayo ang katawhan (gawas sa mga kadagkuan sa gobiyerno ug mga dagkung negosyante), nagpunay nag saka ang presyo sa tanang palitonon. Di ba sila makapaus-os og gamay sa ilang ganansiya, bisag karon lang ning panahon sa krisis? Please na man, moderate your greed! 

Sakripisyo tang tanan uy! Pasagdi lang nang kadagkuan sa gobiyerno, kay di ta kapaabot gikan kanila nga mounong sila kanato.

Brand new silag mga sakyanan nga dili ila. Walay problema sa gasolina, krudo ug  maintenance niini. Bidang hayahaya sa atong mga sulogoon sa lungsod. Ang nakaparat kay samtang nagkagidlay ang lungsod, kita ang mibayad pagpamalit sa mga mahalon ug brand new nilang mga sakyanan. What an irony! 

Mo-sympathize kaha sila nato? Moduyog kaha sila sa atong kalisud? Mosakay kaha silag  PUJ o taxi? O di ba, gamit sa personal nilang mga sakyanan, if only pagdaginot sa gasoline consumption sa gobiyerno? Alang nila, nganong mosakripisyo man sila? Nganong magdaginot man sila sa gasolina nga di man sila personal ang mobayad niini?

What are they in power for? Mga honorable men and women sila sa atong gobiyerno, unya imong pasakyon og PUJ? Imong pa-taxihon? Degrading kaayo kini alang kanila. Ug nganong mogamit man sila sa personal nilang mga sakyanan,nga naa may for official use also nga mga sakyanan? 

Ang irony mao nga samtang ang haring lungsod (panahon sa eleksiyon) nag-antus, silang atong mga sulogoon hayahay kaayo ang kabutang. Mao ba ni ang essence sa demokrasya, nga ang mga public servants hayahay kaayo samtang ang nagsweldo kanila, nag-ilaid sa tumang kalisod? Di ba mao ni ang kahimtang didto sa mga communist countries, Dro?