Masumpo kaha ang Abu Sayyaf?

Sa miaging semana nabulabog ang nasud sa pagkidnap kang Ces Drilon, ang usa sa mga inilang brodkaster sa ABS-CBN, iyang duha ka cameraman ug propesor sa Mindanao State University sa mga bandidong Abu Sayyaf didto sa Jolo sa Sulu. Maayo na lamang kay walay dautang nahitabo sa mga hostages atol sa ilang siyam ka adlaw nga pagkabihag.

Human sa pagbuhi sa mga hostages mimando dayon si Presidente Gloria Macapagal-Arroyo sa kasundalohan paggukod niadtong mga kidnaper kinsa gidudahan nga dako ang nasapi sa maong pagpangidnap. Sa pagkakaron, kamulo nang gitugis sa militar ang mga bandido sa kalasangan sa Sulu.

Apan gitanggong karon sa otoridad si Indanan, Sulu Mayor Alvarez Isnaji ug ang iyang anak nga si Haider tungod sa pagduda nga konsabo sila sa mga suspek sa pagdagit kang Drilon ug kaubanan. Matud sa Philippine National Police nga konsabo kuno si Isnaji ug ang anak niini sa mga kidnapper, kini base usab sa report nga nahagpat sa giingong undercover agent sa kapolisan.

Ang PNP miakusar nga si Isnaji mikuha sa P3 milyones sa P5 milyones nga ransom nga gihatag sa pamilya ni Drilon ngadto sa mga bandido bugti sa iyang kagawasan. Kahinumdoman nga si Isnaji maoy nangulo sa negosasyon alang sa kagawasan sa mga bihag. Gani siya man ang gusto sa mga kidnapper nga ika-negotiate mahitungod kun pilay ransom ang ilang pangayoon.     

Hinuon miadmiter ang mga biktima nga usa usab sila sa mabasol sa ilang gidangatan. Kini gumikan kay wala silay proper coordination uban sa kasundalohan sa ilang misyon pagkuha og estorya mahitungod sa padayong operasyon sa maong bandidong grupo.

Kini miresulta hinuon sa ilang pagkahulog sa laang nga gihan-ay sa laing bangis nga grupo sa Abu Sayyaf. Hinuon kun nagpahibalo pa lamang daan sila sa militar kabahin sa ilang misyon sa kabukiran sa Jolo, dili unta sila mabitik sa laang sa mga bandido.

Dili lamang si Drilon ug ang iyang mga camera man ang biktima sa pagpangidnap sa Abu Sayyaf. Daghang mga journalist kaniadto ang nabiktima usab sa maong bandidong grupo.

Gani pipila sa mga mamahayag kinsa gibihag sa Abu Sayyaf kaniadto naglangkob man sa mga langyaw’ng journalist nga buot unta mo-interview sa mga bandido human sila milusad og mga pagpangdagit sa mga langyaw’ng turista didto sa Sipadan sa Malaysia ug sa Dos Palmas sa Palawan nga nabaniog sa tibuok kalibotan. 

Apan sa higayon nga adunay dagiton ang Abu Sayyaf, dayon lamang og mando ang kagamhanan sa kasundalohan alang sa makusog nga pagtugis sa mga bandido. Kini mabutang hinuon sa mga biktima sa kakuyaw nga kahimtang. Kini usab ang makapugos sa pamilya sa mga biktima paghatag na lamang sa ransom.

Hinuon adunay pipila ang matingala ngano nga sa kagamay sa maong grupo sa mga bandido apan hangtod karon wala pa gihapon sila mapulbos sa militar. Tungod niini makapangutana lamang kita kun nagkulang ba sa kapabilidad ang kasundalohan pag-neutralize sa Abu Sayyaf nga atua lamang unta sa mga isla sa Basilan ug Sulu nagtagotago.

 Gani ang Estados Unidos mitabang man sa kagamhanan paggukod sa mga bandido sulod na sa pipila ka tuig. Apan mora’g wala gihapon magsilbi ang tabang gikan sa Amerika tungod kay pabilin gihapon nagsabwag og kagubot ang maong grupo sa Mindanao.

Hinuon ubay-ubay na sa mga lideres sa Abu Sayyaf ang napatay sa mga operasyon sa kasundalohan. Sa pagkamatay sa mga orihinal nga mga namuno sa maong grupo, nakaingon kita nga na-demoralize na ug mabungkag na sa katapusan ang Abu Sayyaf.

Apan wa damhang nagpadayon gihapon pagpangidnap ug pagpang-atake sa militar ang maong mga bandido uban sa ilang bag-ong mga lider. Gani sa nakalabay’ng mga bulan, subra sa napulo ka sakop sa Philippine Marines ang ilang giambusan ug gipamutlan sa ulo.

Sa naulahing pagpangdagit sa mga bandido, makaingon lamang kita nga bisan pa sa dakong paningkamot sa kagamhanan pagpuhag kanila, padayon gihapon ang operasyon sa Abu Sayyaf. Ug kun kanus-a kining maong mga bandido masumpo, agta ra siguro’y nasayod.

Ipadala inyong reaksiyon sa [email protected]