"Good PM, Sir. Ako lang i-share nimo ang akong kahisagmuyo sa usa ka insurance company. Naa koy sakyanan nga nadasmagan sa laing sakyanan nga naa sa maong insurance company naka-insured. Wala pa gyod ko bayari hangtod karon. Kompleto na man unta ko sa papeles nga ilang gipangayo. Nagsige ra sila’g ingon nga balik-balik lang. Hapit na lang duha ka tuig, hangtod karon wala pa gyod ko bayari. Daghan kaayo ang naglagot ana nila kay langayan. Pabalik-balikon ta unya way klaro. Ang uban tagduha na ka tuig wala gyod ma-release ang ilang tseke. Makalagot." -- 0917-3660515 (Sent: 04:35:28pm--March 19, 2008)
* * *
Gihatag sa atong texter ang kompletong ngalan sa insurance company apan nakahukom kong dili lang una kini ibutyag in fairness ngadto sa tag-iya o tagdumala niini. Dili man god ta gusto nga gamiton kining lindog sa pagdaot sa dignidad sa usa ka indibidwal, institusyon, establisamento o kaha negosyo. Hatagan ko lang kamo’g clue sa ngalan sa maong insurance company. Ang ngalan niini mao ang unang letra sa Griyegong alpabeto. Sa akong tan-aw, mas maayong palamboon sa maong insurance company ang sistema sa ilang pagpangalagad ngadto sa ilang mga kliyente aron walay magbagulbol ug mahisagmuyo ngadto kanila. Kana bang paspas nga pagpangalagad!
* * *
"Good day, Sir. Ang among amo salbahis. Sige siyang kuha sa among suweldo para SSS. Kada semana gyod. Unya wala niya i-remit. Wala pa gyod siya kaila og holiday. Patrabahoon mi bisan holiday." -- 0909-2155995 (Sent: 09:51:22am-March 19, 2008)
* * *
Labing maayo nga magpadangat ka’g reklamo ngadto sa SSS kun nakaseguro ka gyod nga wala i-remit sa imong agawon ang imong SSS contribution bisan kanunay gikuhaan ang imong suweldo alang niini. Dako kaayo’g posibilidad nga mapasakaan og kaso sa SSS ang imong amo. Kanang bahin sa pagtrabaho sa holiday, okey ra man kana basta bayran kamo sa husto. Ayaw gyod mo pagpaalkanse sa bentahoso nga mga employer nga gustong mopahimulos sa inyong kusog.
* * *
(Sumbong ug reklamo? Text sa 0910-8105522)