Makab-ot kaha ang hustisya ni Atty. Sison

Gisignit sa mga sakop sa National Bureau of Investigation ang security guard nga si Nemuel Camay Sumabong kay maoy gitudlo sa mga testigo nga maoy mibanhig patay kang manlalaban Richard Sison. Tungod niini kasong murder karon ang giatubang ni Sumabong sa piskaliya ug hayan sa dili madugay masang-at na kini ngadto sa hukmanan.

Giabibahan ni Mayor Tomas Osmeña ang National Bureau of Investigation tungod sa pagkasikop ni Sumabong ug gani naglaraw pa kini nga mohatag og pahalipay niadtong makahatag og kasayoran alang sa pagkasikop sa kauban niini.

Apan duda ang katawhan ning pagkasikop ni Sumabong. Maoy ilang pagtoo nga naa-an lamang ang akusado ug dili kini ang tinooray nga naghimo sa krimin tungod sa mga panghitabo nga nagpalibot sa pagpatay sa biktima ug sa iyang pagkasikop. Mibarog man ugod sa depensa ni Sumabong ang mga kawani sa tindahan nga iyang gibantayan nga niadtong oras nga gibanhigan patay si manlalaban Sison didto ra si Nemuel Sumabong sa tindahan ug wa kini molakaw. Gidasunan usab sa kaubang security guard ug sa manager sa agency ang depensa ni Sumabong ug ang pamahayag sa mga kawani sa tindahan nga iyang gibantayan bisan man tood og dili sila makapakita og logbook.

Sa akong basa dunay basihanan kining mga pagduda sa katawhan nga naa-an lamang ang akusado nga si Sumabong. Tungod kay unsaon man pagpatay ni Sumabong ni Sison kun niadtong orasa nag-duty siya gikan sa alas siete sa buntag ngadto sa alas siete sa gabii. Ang krimin nahitabo sa may dalan V. Sotto samtang ang tindahan nga gibantayan ni Sumabong nahimutang sa dalan Magallanes. Ug wa ko masayop layo-layo ang distansya ning duha ka dalan. Busa giunsa man pagpatay ni Sumabong si Sison sa may dalan V. Sotto kun niadtong orasa didto ra siya sa tindahan nga iyang gibantayan sa dalan Magallanes? Ibutang ta nga mibiya si Sumabong sa iyang poste ug gipatay si Sison, iya kaha kining mahimo nga dili mahibaw-an sa mga tindera o ba kaha sa tag-iya sa tindahan nga iyang gibantayan? Si manlalaban Sison gipatay pinaagi sa banhig mga alas onse pasado sa buntag. Wa siya patya sulod o ba kaha dool sa iyang opisina. Wa siya patya sulod o ba kaha dool sa iyang panimalay. Gipatay siya sa lugar nga layo sa iyang panimalay ug opisina busa dako ang posibilidad nga gisundan ni siya sa kriminal nga nangita lang og higayon nga makabira sa manlalaban.

Ang pagsunod-sunod lang sa target mokaon na og dakong oras, igong rason nga makapatingala o makapareklamo sa tindera o sa tag-iya sa tindahan kun nganong mibiya kini sa iyang gibantayan. Apan wa sila moreklamo, hinoon ilang giingon nga wa mobiya si Sumabong sa iyang puwesto.

Ibutang ta nga gitun-an na daan sa akusado ang lihok sa biktima, lisod gihapon niyang mahimo ang krimin nga dili siya mokaon og dakong oras. Dinhi mahinungdanon kaayo ang elemento sa oras. Busa kun misibat man si Sumabong sa tindahan nga iyang gibantayan, dili mahitabo nga dili siya mahibaw-an ug dili mahitabo nga siya depensahan.

Mao kini ang nakapaduda sa katawhan sa pagtudlo ni Sumabong nga mao ang mibanhig patay kang manlalaban Richard Sison. Pun-an pa kini sa mga palpak nga operasyon sa National Bureau of Investigation sama sa pagrapido niini sa mga empleyado sa Plantation Bay, pagsulbad sa kamatayon ni Wewe Lao nga matud pa ang tigtimpla lang og coffee ang gipapriso pero ang tinood nga kriminal gawasnon, ug ang pagronda sa bugas ni Reagan King.

Busa gi-awhag nako ang National Bureau of Investigation sa pagpalawom pa sa imbestigasyon ning kaso ni manlalaban Sison aron makab-ot gayod ang hustisya sa iyang kamatayon. Ang pagtaral ngadto sa hukmanan sa tawo nga gidudahan nga naa-an lamang, usa ka dakong inhustisya dili lamang niining maong tawo kun dili ngadto usab sa biktima. Dili malipay ug dili mahimutang si manlalaban Richard Sison sa iyang lubnganan kun ang gitaral ug gipatubag sa iyang kamatayon inocente.