Abigail

Siya ay maganda -– walang kasing-ganda

sa mga babaing aking nakilala;

siya ay mabait laging nakatawa

mata ay mapungay kapag tumatawa!

Noong siya’y bata natatandaan ko

lagi s’yang kasama ng ina sa banko;

Nang panahong iyo’y bagong kasal ako

kaya ang paghanga’y tulad sa ama mo!

Habang lumalaki’y lalong gumaganda

hanggang sa mapansing dalaga na pala;

Kapag nagagawi sa tahanan nila

sa aking pagbati’y ngumingiti siya!

Sa aking pagbati kasama’y paggalang

pagka’t ama’t ina’y kapwa kaibigan;

siya ay bumukad na isang halaman

mabangong bulaklak na dapat hangaan!

Ang hindi ko alam kung may bofriend ka na?

sa mayroon o wala ako’y iyong ama;

Na sa iyong kasal kung maiimbita -

kung walang aawit ako ay tutula!

Ang mutya ay anak ni Baby at Calex

Na sa aming baya’y kapwa umuugit;

Ang ina’y si Venus ang nakakawangis

At ang ama nama’y parang si Adonis!

Dahil sa ang Mutya’y likas matalino

natapos n’ya agad pag-aaral nito;

Kung ang mga anak may ganda’t talino

Sa aking pagtula’y laging inspirado!

Kaya inspirado sa aking pagtula

mutyang pinupuri ay isang diwata;

Tiyak ang anak mo’y maganda ring mutya

ang apo ko naman ang s’yang tutula!