Sayon pag-legislate sa sweldo, apan … !

Kining problema sa sweldo, dugay na kaayo ni. Sa pagkamatngon nakog buot, pirme kong makadungog sa among tatay ug nanay nga maghisgot, usahay maglalis bahin sa sweldo ni tatay. Ang sweldo ni tatay,akong hinumduman, P80 ang buwan, ug ang minimum nga sweldo P120 ang buwan. Sa ato pa, wa kaabut sa minimum ang sweldo sa akong tatay.

Maayo man gani kay sa among panahon, medyo taas ang purchasing power sa among peso. Ang dollar exchange was P4.00 matag U.S. dollar. Mao nga sa akong pagpangompra sa merkado, isda, itlog, kamunggay, asin, sibuyas, magda lang kog   20 centavos, duna pay sukli.

Apan, karon, ang inyong dos pesos, tulo ra ka kendi ang mapalit. Ang cine, 10 tabos ra, double program pa. Apan, karon, bisag senior citizen pa, kapin na sa one hundred pesos ang mabayad.

Midagan ang panahon. Ambut unsay role sa gobiyerno nga alang nako, nagka-ut-ot man ang atong nasud. Nagkadaghan ang gustong molalin ngadto sa ubang kanasuran, aron makapuyo niining gitawag nga decent living.

Gumikan sa nagka-ut-ot nga ekonomiya, nagkadaku ang problema sa suholan. Ug ang kanunay natong pasanginlan, mao ang mga negosyante, ang mga employer.

Kahinumdom ko sa panahon ni Senador Ninoy Aquino. Matud niya, alang sa Kongreso, sayon kaayo pagpa-usbaw sa sweldo. Sayon kaayo ang pagpanday og mga balaod, nga mag-set sa minimum wage.

Gani, matud niya, mahimo nga atong umintohan ang mga sweldo, across the board, nationwide, sa P100, P200, bisan pag P500 nga increase. Mahimo kaayo ni nato sa Kongreso. Apan ang pangutana, kaya ba ni sa mga employer?

Mao ni ang dakung pangutana. Duna mi gamay'ng export business. Bag-o lang ming nanira, kay di na gyud madaa. Ang among suki, tua na magpalitan sa China kay barato kaayo ang mga export products didto.

Karon, pugson nato pagpataas ang mga sweldo. Nindot paminawon. Unya, i-legislate pa gyud, sa ato pa, but-an gyud sa balaud pilay minimum nga sweldo. Very good. Apan, kaya kaha ni sa mga employer?

Ikaw, Dro, duna ka bay negosyo? Uyon ka ba, o kaya ba nimo nga ang balaod maoy magbuot kun pilay imong isweldo sa imong mga empleyado?