Pabagaay sa nawong

Didto sa kaulohan gireklamo sa mga konsumedor ang kataas sa singil sa Meralco sa ilang kuryente. Ang maong reklamo nakaagni sa mga magbabalaod sa pagpahigayon og usa ka Congressional investigation. Ang nahisgutang imbestigasyon mibulgar sa mga di makiangayon nga balayranan nga gipatong sa Meralco ngadto sa ilang mga konsumedor. Usa na niini mao ang gitawag og “System Loss charge”.

Gawas sa system loss charge nag-ung-ung usab karon sa Energy Regulatory Commission ang petition sa Meralco ug Napocor nga nangayo og pagtugot niini nga tugotan ang ilang kasabutan nga ang mga konsumedor mao ang pabayron sa 14.7 bilyones ka pesos nga utang sa Meralco ngadto sa Napocor. Ang system loss charges gikolekta kini sa Meralco sa ilang mga konsumedor agi og bayad sa ilang kuryente nga gikawat ug nausik. Buot ipasabot, hayahay kaayo ang baga sa mga kawatan og kuryente didto sa kaulohan kay ang mga konsumedor man maoy nagbayad sa ilang gikawat nga kuryente.

Ang system loss charges usab ang nagbayad sa kuryenteng nagamit sa Meralco sa ilang inadlaw-adlaw nga operasyon. Nga sa ato pa libre sa kuryente ang Meralco kay ang mga konsumedor man maoy nagbayad niini. Dinhi sa Sugbo ang Visayan Electric Company naningil usab og “system loss charges” sa ilang mga konsumedor. Buot ipasabot, ang VECO way kalainan sa Meralco. Ang mga konsumedor usab ang gipabayad sa mga gikawat ug nausik nga kuryente. Makatarunganon ug makiangayon ba kining gihimo sa VECO ug MERALCO ug sa uban pang mga electric company nga seguro nangolekta upod niining system loss charges? Nganong ang mga konsumedor man ang ilang gipabayad sa kuryenteng gikawat.

Nganong wa man sila maningil niini ngadto sa mga kawatan og koryente? Aduna man kitay pilferage law nganong wa man kini nila gamita? Ang angayan unta nga himoon sa VECO, MERALCO ug uban pa mao ang pagbutang og mga tigpaniid aron maoy maniid niadtong mga kawatan og kuryente aron dili kini maalkanse. Unya pasakaan usab dayon og kaso kadtong masakpan ug mao kini ang pabayron sa nakawat niining kuryente. Ang nakaapan upod ning mga kompanyaha kay dawat lang og limpiyo. Ipasa lang dayon ngadto sa mga kunsumedor ang ilang palpak. Sa mga nausik nilang kuryente nganong ang mga kunsumedor man usab ang pabayron? Dili ba sobra na kining ilang gihimo?

Sila ang nag usik-usik sa kuryente tungod sa guba ba kaha nilang kagamitan kitang mga konsumedor gihapon ang pabayron? Pabagaay na man ni sa nawong!  Sa padayong imbestigasyon sa ubos balay balauranan mahitungod sa Car Smuggling dinhi sa Sugbo wa pa gihapon hinganli sa Presidential Anti-Smuggling Group ang mga pangalan sa giingon niining unom ka mga smuggler og mga luhong sakyanan.

Hinoon gisumeter na ni Usec Villar ngadto sa Committee ni Romualdo ang giingong pangalan sa mga smuggler. Pero hasta upod si Romualdo nagdumili usab sa pagbulgar sa nahisgutang mga pangalan. Sa unsa man nga rason nga gilangay-langay man nila sa pagbulgar ngadto sa publiko ang pangalan niining maong mga giingon nilang smuggler og sakyanan? Kun lig-on man ang mga ebidensiya  nga nakuha sa PASG batok ning mga tawhana nganong gitago-tagoan pa man ni sila? Wa kahay laing hinungdan kun nganong gilangay-langay sa pagbulgar sa PASG ug komitiba ni Romualdo ang pangalan sa mga gipasanginlan nga smuggler og sakyanan? AMBOT LANG!