Adoracion Nocturna Filipina

Nakadungog ba mo ini? Labing seguro, ilabina sa mga batan-on, wa gyud. Ingonman, bisan sa mga hamtong na, daghan na usab ang wa kahibawo unsa kini.Gani bisan sa pipila ka mga pari, wa kaayo sila mag-interest niini.

Sa pulong nocturn, sa ato pa, kagabhion. Literally, nagpasabot og adorasyon, pagpangaliya, pagsimba, pagpangaliyupo, pagtamod, ug pagpasidungog sa Ginoo panahon sa kagabhion, atubangan sa Lawas ug Dugo ni Hesucristo diha sa Santasimo Sacramento sa Altar.

Ato ning gihisgutan dinhi, tungod kay medyo ang maong debosyon wala na kaayo makadani sa modernong katilingban. Busy na kaayo kita sa ubang mga lingaw ug kalingawan sa kalibutan. Ang tanan alang na lang gayud pagtubag sa mga panginahanglan sa lawas ug pagtagbaw sa mga lawasnong kahinam ug kahigal.

Wala na kitay panahon alang sa mga panginahanglan kalagnon. Di ba, Dro? Maoy hinungdan nga ato kining daklitan paghisgot dinhi, pahinumdom nga ang tanan ning kalibutan dili kay pulos lang sexy figures suma sa sagad natong makita sa mga basahon.

Ug nganong gabii man gyud? Di ba mahimo sa buntag, sa udto o sa hapon? Nganong magtukaw man gyud? Si Msgr. Cayetano Gelbolingo, P.A., Archdiocesan Director sa Adoracion Nocturna Filipina (ANF) dinhi sa Sugbo, mi-eksplikar:

• Gabii kadto ang pag-antos ni Jesus sa tanaman sa Gethsemane.

• Gabii kadto ang pagsingot niyag dugo.

• Gabii kadto ang pagbudhi ni Judas kang Jesus.

• Gabii kadto ang pagbiya kaniya sa mga Apostoles. Ang pagpakita sa ilang katalawan. Sa pagduka ug pagkatulog sa tulo ka pinili niyang Apostoles.

• Gabii kasagaran ang paghimo sa tawo sa mga sala. Pagbuong sa dungog, pagpanimalos, ug pagtagbaw sa lawasnong kahinam sa tawo.

Natukod ang ANF dinhi sa atong nasud niadtong Oktubre 10, 1920 (dugay na kaayo no?) didto sa Manila, ug dinhi sa ato, sa Marso 27, 1937 sa Parokya sa Pardo (dugay na sad kaayo no?).

Sige pa ba kini karon? Of course, daghan pang mga parokya sa tibuok archdiocese sa Sugbo, gumikan sa pag-ikag sa ilang mga parish priests, ang nagpadayon pagtukaw, pakig-uban ni Jesus, agig tubag sa pangutana ni Jesus kun “Dili ba diay kamo makauban ug makatukaw kanako, bisag usa lang ka takna?”

Unsay tubag nimo ini, Dro?