Ang untouchable

Bisan pa man sa nagpadayong imbestigasyon karon sa ubos balay balauranan mahitungod sa giingong grabe na nga car smuggling dinhi sa Sugbo ang Bureau of Customs sa Port of Cebu mimarka kini og taas nga collection sa buhis sa miaging buwan sa Abril ug sa unang quarter ning tuiga. Sa target collection nga 420 milyones ka pesos sa buwan sa Abril ang Bureau of Customs Port of Cebu nakakolekta kini og 480.2 milyones ka pesos.

Sa ato pa misubra og 60.3 milyones ka pesos ang nakolekta nilang buhis. Si Customs Collector Ricardo Belmonte mitug-an usab nga sa unang quarter sa tuig ( Enero-Marso) ang Port of Cebu aduna usay surplus sa ilang collection nga mokabat og 114.8 ka milyon ka pesos. Si Nicomedick Carino, Port of Cebu Chief of Staff mitumbok ngadto sa sakto ug maayong kwentada sa buhis ug valuation sa mga shipment nga maoy nakapataas sa collection.

Samtang si Carlos Corsiga ang hepe sa Assessment miingon nga ang mga dagkong kompanya nga kanunay nga namalit og mga kagamitan sa ilang operasyon didto sa gawas sa nasud ang usa usab sa nakatabang sa pagtaas sa ilang collection. Bisan man tuod kun ang mga importers og mga spare parts ug nanghimo usab og mga behikulo mihunong na sa pagpamalit didto sa gawas sa nasud sukad pa kaniadtong buwan sa Disyembre tungod sa Congressional investigation mahitungod sa car smuggling padayon gihapon nga misaka ang collection sa buhis sa Bureau of Customs Port of Cebu.

Sakto si Florante Ricarte, Assistant Assessment Chief sa iyang gisulti nga ang surplus nga collection sa Customs Port of Cebu nagpakita lamang nga wa maapektohi ang ahensiya sa nagpadayong imbestigasyon mahitungod sa car smuggling dinhi sa Sugbo. Ang pagtaas sa collection sa Port of Cebu bisan pa man sa pasangil nga rampant ang car smuggling dinhi sa Sugbo maoy alas ni Collector Ricardo Belmonte nga nahimo siyang untouchable sa iyang katungdanan.

Si Pangulong Arroyo mismo ang nagpahibalo nga daghan ang nagtinguha nga tangtangon si Collector Belmonte sa iyang katungdanan, apan si Pangulong Arroyo upod mismo ang nagpahibalo nga dili niya hulipan si Boysie sa katungdanan tungod sa maayo niining performance. Si Collector Belmonte nahimong untouchable sa iyang katungdanan dili tungod kay suod ba kaha siya sa pangulo kun dili nahimo siyang untouchable sa iyang katungdanan tungod sa maayo niining performance. Busa kun gusto mong magpabilin sa inyong katungdanan sunda ninyo si Collector Belmonte.

Maayong fiesta sa mga taga Mandaue nga nagsaulog karon sa ilang pangilin.