Balik ta's bulsita

Angay’ng suportahan kining giplano sa mga opisyal sa dakbayan sa Sugbu nga idili na ang pagpagamit og plastic shopping bags ingon man uban pa nga susama nga produkto.

Ang tumong niini mao nga maiban-ibanan kun dili man g’yod hingpit nga masulbad ang dugay na kaayong drainage problem nga nagumikan sa pagpataka lang og labay sa mga plastic.

Tiaw mo, matud ni Konsehal Augustus Pe Jr. nga hapit katunga sa gidaghanon sa mga basura naglambigit og mga plastic o mga silopin nga dili g’yod madugta.

Si Konsehal Roberto “Bob” Cabarrubias maoy nagplano nga mosugyot og ordinansahon nga magdili o kaha mag-regulate sa paggamit og mga plastic products.

Labing siguro mosalmot usab niini si higalang Konsehal Nestor Archival kay siya man ang chairman sa committee on environment sa konseho sa dakbayan.

Awhag nako nila ni Konsehal Pe ug Archival, kinsa dakung pabor sa pagpagamit pagbalik sa bulsita inay plastic bag, nga makig-alayon kamo ni city planner Nigel Paul Villarete kay dunay pagtoon siya nga gihimo.

Dinhi sa Kabisay-an, mora’g usa pa lang ka local government unit ang naghimo niini nga mao ang usa ka lungsod sa Iloilo.

Makapabara man god sa dagan sa tubig diha sa drainage system ang mga silopin kay dili man kini madugta. Husto ang sugyot sa uban nga bisan ang putos sa “ice water” angay’ng idili na usab ang plastic.

Buyno, dili man mahimo nga ang tubig puston og bulsita, apan kinahanglang pangitaan kini og maayong paagi.

* * *

Kinsa ba kadtong guwardiya sa Mandarin Security Agency nga naghinambog sa miaging Biyernes duol sa usa ka botika diha sa dalan Colon?

Usa ka kawani sa University of the Visayas mireklamo kanako mahitungod sa hinambog nga lihok sa guwardiya nga nagdala sa apelyedo nga Arsolon.

Si Mannix, nagtindog atubangan sa usa ka photo copier diha sa eskena Colon ug D. Jakosalem dihang dunay armored van nga may marka nga ATP Inc. nga miabot.

Dayon nanganaug ang sakay niini, apil ang mga unipormadong guwardiya ug gitukmod si Mannix nga diha nang daan nagtindog samtang nagpaabot nga mahuman ang iyang gipa-photo copy.

Wala g’yod hinoon gikusog pagtukmod si Mannix apan napunta g’yod tawon siya sa daplin. Ingon ba god niana ang tukmang pamatasan sa guwardiya?

Mahimo tingali nga mohinay ka pagsulti nga “excuse me, mahimo ba og mopadaplin Bay kay moagi mi.”

Ang gihimo nimo Arsolon klaro kaayong hinambugero. Dugay man g’yod ko nga guwardiya kaniadto sa wala pa ko sa media, dili ingon niana ang akong batasan.

Ang tawo nga imong giwakli o gitukmod mas taas pa tingali og kinaadman nimo. Ayaw na’g usba ang imong gihimo aron dili ka masaway sa makakita nimo.

* * *

Pahalipayan diay nako ang mga tinugyanan sa Cebu City Medical Center pinangulohan ni Dr. Myrna Go tungod kay ang CCMC nagsaulog karong adlawa sa iyang ika-47 ka tuig sukad sa iyang pagkamugna.

Aw di man g’yod hinoon karong petsaha nga gihimo ang tambalanan, apan Abril 27, 1961 nga napasar ang ordinansa 343 nga nagmando sa pagmugna og Cebu City Hospital aron maalagaran ang panglawas sa mga taga dakbayan.

Bisan sa mga magsaway tungod sa dili usahay maayong serbisyo, apan ang CCMC padayon nga nagserbisyo sa mga kabus nga dili intawon makaabot pagpatambal sa mga pribadong ospital.