Paukyab sa PASG

Gipadayon sa House committee on good government ang ilang imbistigasyon niadtong miaging Miyerkules sa giingong naghitak nga car smuggling sa pantalan sa Sugbo. Atol sa pagpadayon sa imbistigasyon mitungha na ang hepe sa Presidential Anti-Smuggling Group nga si Usec. Antonio Villar diin sa sayo pa gitinguha nilang kongresista Antonio Cuenco ug kaubanan nga ipadakop tungod sa pagmagahi niini pagsanong sa mga nanlabay’ng imbitasyon sa komitiba.

Sa iyang pagpatim-aw sa kongreso da ni Villar ang giingong listahan sa unom ka mga tawo nga responsabli sa pagpayuhot og sakyanan dinhi sa Sugbo. Gisumitir niya ang maong listahan ngadto sa komitiba nga gipangulohan ni kongresista Pedro Romualdo sa Camiguin apan gihangyong isipon ni nga confidential sanglit wa pa sila'y ebidensiya. Giangkon sab ni Villar nga duna silay report nga ang maong mga “smugglers” nagpahimus sa proteksiyon sa mga opisyal ug kawani sa gobyerno.

Apan sama sa gihapon wa sab kuno silay ebidensiya batok sa maong mga kawani ug opisyal. Kun maong wa diay silay ebidensiya, unsa may kapuslanan sa maong listahan? Unsa man say gamit niini sa komitiba ni Romualdo sa pagpanday og balaud diin maoy tumong ug tuyo sa ilang imbistigasyon? Alang nako, way unod ang maong report ug labaw’ng wa ni’y kapuslanan. Wa silay ebidensiya busa di mahitabong makapasaka sila og kaso.

Labaw nang di mahitabo nga mabulgar ni sa publiko kay sigurado kong lamukon sila’g kiha kun ila ning himuon nga wa diay silay ikasuporta. Usa lang ka simpleng paukyab ang report kunohay sa PASG ug way pa gani’y siguro nga drama lang ang maong hitabo aron pag-justify sa ilang pag-usik usik sa kwarta sa gobyerno paghimo og imbistigasyon nga way kapuslanan. Niingon sila nga kinahanglan kunong amendahan ang Tariff and Customs Code ug mopalabang og balaud batok sa smuggling.

Tinuod nga ato ning gikinahanglan, apan wa kinahanglana nga mag-usik sila og oras ug kwarta paghimo og imbistigasyon nga wa gyuy klarong padulngan. Wa ni’y kalainan sa imbistigasyon niadto ni Kongresista Antonio Cuenco batok sa managsuong Peter ug Willington Lim nga iyang giakusahan nga mga druglords. Pero unsay nahitabo, igo lang gidaot sa komitiba ni Cuenco ang reputasyon sa managsuong negosyante ug wa gyud kamatuod sa iyang alegasyon.

Hangtud karon wa gyud gani’y kasong nahimo ang atong gobiyerno ug bisan na si Cuenco nga maoy direktang namasangil kaniadto ubos sa landong sa iyang “parliamentary immunity.” Naangin intawon ang mga tawo nga iyang gigamit nga mga saksi ug ang labing pait kay way nahimo si Cuenco pagsagang sa bwelta sa managsoong Lim. Unsay resulta, di ba si Bernard Liu man hinoon maoy nakalaboso sud sa taas taas nga higayon? May nalang gani nga nakabuhi na si Liu.

Gitabangan man tinuod siya ni Cuenco nga makagawas apan human na siya makatilaw og prisohan ug wa na magkadimao ang iyang kinabuhi ug sa iyang pamilya. Ang labing luoy mao si Ananias Dy nga gipatay sa wa pa mailhing mamumuno hangtud karon nga wa man lang gani siya kahatagi og security. Unya karon, ambot og sulagma ba lang sab kaha nga siya na say principal sponsor niining imbistigasyon sa kongreso sa car smuggling sa Sugbo.

Hinaut nga wa na po’y Ananias Dy ug Bernard Liu nga maangin niining maong kaso. Kay sa akong tan-aw mura man og nilugak si Cuenco sa maong kaso. Gani atol sa hearing niadtong Miyerkules igo man lang siyang mipakita makadiyot ug dayon kahanaw nga wa gani mosalmot sa paggaling sa mga pangutana kang Villar nga unta usa man siya niadto  sa nangugat gyud nga patunghaon si Villar. Ang kalit niyang pagpakahilom atol sa labing uwahing hearing daw sa di man kasagaran niyang batasan. Ambot unsay bug-at nga hinungdan sa iyang kalit nga pagpakahilom sa maong kontrobersiya.

Nakab-ot na kaha niya ang gusto niyang makuha ug masayran? Maong siya nagpakahilom nalang sa daplin?

* * *

[email protected]