Hilaw nga kadaugan

Salamat nga sa katapusan napasakaan na gyod og kasong kriminal ang mga opisyal nga nalambigit sa pagpaborot sa decorative lamppost. Sila si kanhi mayor sa dakbayan sa Mandaue Teddy Ouano, kasamtangang mayor karon sa dakbayan sa Lapulapu Boy Radaza, kanhi director sa DPWH-7,Roberto Lala ug lain pang 19 ka mga opisyal sa DPWH-7 ug Engineering Office sa duha ka dakbayan, kauban usab kanila ang tag-as nga opisyal sa FABMIK ug GAMPIK ang nag-atubang na og kasong kriminal human si Ombudsman Merceditas Gutierrez miuyon sa tanang rekomendasyon nga gisumeter sa Ombudsman Visayas ngadto kaniya.

Niini makaingon ta nga naka first base na ang katawhan nga natukob sa mga bag-angang buaya. Apan subo nga palandungon nga ang pinakadako og bag-ang sa maong mga buaya wa maapil sa mga gipasakaan og kasong kriminal o bisan kaso na lamang administratiba.

Si Assistant Ombudsman Virginia Palanca Santiago sa akong interview kaniya sa Saksi Evening Edition sa DySS miingon nga wa nila apila sa pagpasaka og kaso si Secretary Hermogenes Ebdane tungod kay walay direktang ebidensiya nga naglambigit kaniya nga apil kini sa nabusog human makatukob sa kwarta sa katawhan. Matud pa niya nga bisan man tuod og adunay mga pasangil batok kang Ebdane pero walay mibarog nga testigo ug mga dokumento nga nagtumbok niini nga apil sa nabusog. Pero sa gihapon ila kining giapil sa girekomendar nga imbestigahan.

Kun si kanhi Mayor Teddy Ouano napasakaan og kasong kriminal tungod lang sa iyang pagpirma sa Program of Works and Estimates sa proyekto,way rason nga dili apilon sa pagpasaka og kasong kriminal si Secretary Ebdane nga giingon sa iyang mga sakop nga maoy mimando kanila sa pagpadali sa gipaburot nga proyekto. Hagit usab nako sa mga opisyal sa DPWH-7 nga kun tinuod man nga igo lamang kamong misunod sa sugo ni Ebdane, barugi kini ninyo kun tinuod ang inyong gisulti,puslan man.

Pero kun di ninyo barugan ang inyong pasangil ngadto ni Ebdane nagpasabot lamang kini nga gihimo lamang ninyo siyang rason sa paglusot sa inyong pagpaburot. Ako di ko motuo nga wa mabusog human makatukob si Secretary Ebdane sa tambok nga pundo sa decorative lamppost. Busa ang ombudsman kinahanglan nga mangita gayod og paagi nga mahukasan sa iyang maskara si Ebdane, di kay makontento na lamang sa ilang unang findings. Ang paglingkawas ni Secretary Hermogenes Ebdane sa kaso sa lamppost maoy nakapahilaw sa pasiunang kadaugan nga nakab-ot na sa katawhan.