Kitang mga pobre

Hilabihan ka tukma ug nindot kaayo ang tinguha ni higalang Konsehal Edgardo Labella nga angay’ng dili ilakip sa implementasyon sa Expanded Value Added Tax (Evat) ang mga pagkaon, fuel products ug medisina.

Tataw kaayo ang tumong sa konsehal nga ang pag-exempt sa maong mga produkto mao ang paghatag og gamay’ng benipisyo sa mga kabus nga dili kaayo maapektohan nunot niining pagsaka sa presyo sa palaliton.

Tinuod, kun walay Evat ang presyo sa bugas maminusan kini og 12 porsiyento ang iyang kantidad. Sama usab ang mahitabo sa mga petroleum products, ug ilabi na ang mga tambal.

Pwerteng paita bitaw, sayonan ka kun duna kay pasyente nga ma-admit sa ospital unya nanginahanglan og tambal, gawas sa daku nimo nga bayranan, anaa pa ang Evat nga 12 porsiyento.

Kay sigurado man nga paluyohan sa iyang mga kaubang konsehal kining maong resulosyon ni Labella, ang sunod natong iampo mao nga suportahan kini sa mga magbabalaud.

Apan ang buotan natong kongresista dinhi sa Cebu City north district nga si Raul del Mar angay nga maoy mangunay sa paghimo og lakang mahitungod niini.

Kinahanglan man god nga amendahon kun himoan og lakang aron usbon ang pipila ka lagda sa Republic Act 9337, ang Evat law, aron nga itataw nga dili ilakip sa implementasyon ang mga fuel products, pagkaon ug mga tambal.

* * *

Ang kadagkoan sa Associated Labor Unions-Trade Union Congress of the Philippines (ALU-TUCP) midemanda nga usbawan ang sweldo sa mga kawani og P150 matag adlaw.

Nindot kaayo kun kini matuman, ilabi na kun himoon nga “across the board” ang increase. Ang gitawag og across the board mao ang pagpausbaw sa sweldo sa tanan g’yod nga kawani.

Duna man go’y increase nga alang ra sa gitawag og mga minimum wage earners, kadtong mga nagsweldo nga igo ra g’yod nga nakapatong sa gibasi sa minimum wage, ilabi na sa wala makaabot sa kantidad.

Husto ang argumento sa uban nga kinahanglang himoong across the board ang increase tungod kay ang tanan man nga katawhan ang nag-antos sa pagsaka karon sa presyo sa mga palaliton.

Misiga lagi ang akong duha ka mata pagka kita nako nga ang presyo sa “Ganador rice” nga duha ka semana ang milabay gibaligya pa lang og P37, apan niadtong miaging semana tag P44 na man ang kilo.

Ang mga magpapatigayon misugyot nga imbis salary wage increase, incentives lang maoy ihatag sa mga mamumuo atul niining economic crisis karon.

Nagtoo man god sila nga mobalik ra ang presyo sa atong mga nag-unang palaliton. Ang gikuyawan nako og padayon na ang presyo ani.

Samtang nag-ampo ang mga mamumuo nga usbawan unta sa Regional Tripartite Wages and Productivity Board ang sweldo dinhi sa rehiyon, apan duna say kabalaka.

Tukma usab si Konsehal Eduardo “Edu” Rama nga daghang mga agawon ang dili makaabot sa paghatag sa P150 nga usbaw. Bisan gani tingali og P50 lisud kini alang sa ubang magpapatigayon.

Sus, kun dunay P50 nga usbaw sa sweldo matag adlaw, maglukso-lukso na ko sa kalipay. Nagpasabot kini nga daw sa malibre na ang budget nako sa bugas alang sa usa ka buwan.

Kamo diha, wala pa kamo maglisud? Sayod ko nga wala ko mag-inusara sa akong kapobre.