Ato ning klaruhon. Iresponsable ang gihimo sa hubog nga 39 anyos nga bayot nga nisugat sa bag-ong tuig pinaagi sa pakighilawas sa lalaki nga, gawas nga di niya kaila, nikuyog lang human saari nga bayran og P100. Ngil-ad man nga ingnong mirisi sa iyang gidangatan, apan mabasol siya sa di maayong sangpotanan sa pataka ug marka-bahala nga pakigrelasyon.
Di hinuon siya angay'ng paskan og body spray sa lalaki. Bisan pag nainsulto dihang iyang giingnan nga “mubo rag bunal.” Labaw nang di siya angay'ng kataw-an ug bugal-bugalan sa operating room. Sa mga doktor ug nurses nga mao untay gisaligan nga makatangtang sa butang nga nakahasol ug nakapasakit niya sud sa tulo ka adlaw sa wa pang operasyon.
* * *
Pipila ka adlaw human sa operasyon niadtong Enero 3 karong tuiga, na-upload sa YouTube ang video nga nagpakita sa operasyon sa pasyente sud sa operating room sa Vicente Sotto Memorial Medical Center (VSMMC) nga nahimong morang buwangan ug peryahan. Mas nauna pa ang pagpakatap sa video pinaagi sa cell phones. Nikisaw na lang pag-ayo dihang mas daghan nang nakakita sa internet.
Sa wa pa mokaylap pag-ayo ang kasayuran mahitungod sa video, gikuha ang materyal gikan sa YouTube. Apan ang nakalisod sa internet mao nga kun ma-upload nang video lisod nang bakwion. Kay si bisan kinsang nakakita makahimo pag-download ug pagpreserbar ini. Usa sa labing uwahing nakakita mao si Barangay Kapitan Dave Tumulak sa Basak, Cebu City. Nga, lahi sa unang mga nakasaksi sa eskandalo nga igo lang nitabang pagpakatap sa huhungihong, may katakos ug igong pagpakabana pagtabang sa biktima, nga molupyo sa iyang barangay.
* * *
Sa una pa lang pagtumaw sa video, nilusad dayon og imbestigasyon ang kadagkoan sa VSMMC. Mao nay ilang gitug-an sa Department of Health (DOH 7). Kredito ni alang ni Dr. Gerardo Aquino Jr., medical director, ug ubang tagduma sa tambalanan. Kun tinuod nga nangimbestigar na sila upat ka buwan sa wa pa mohulga ang pasyente pagkiha nila.
Lisod hinuong ipatin-aw nilang Aquino ug kaubanan nganong, kapin na sa upat ka buwan human sa panghitabo, wa pay sangpotanan sa imbestigasyon. Giangkon ni Dr. Manny Gines sa VSMMC nga wa pay doktor ni nurse nga nasilotan o napaubos sa preventive suspension.
* * *
Mahimong molusot ang mga doktor ug nurses pinaagi sa pag-ingon nga lehitimo ang ilang pagdokumento sa operasyon, gawas nga nipirma og pagtugot ang pasyente. Apan ang video maoy labing higpit nilang kaaway. Kay kuwang na lag dyutay nga ilang ipakayab ang imbitasyon sa atubangan sa VSMMC aron makasud ang tanang ganahang manan-aw sa pasundayag.
Akong sugyot ngadto sa mga doktor, nurses ug mga tagduma: Angkona ang responsibilidad sa eskandalo; pangayog pasaylo sa biktima ug sa katawhan; ug dawata ang labing tukmang silot.
* * *
Email: leo_lastimosa@abs-cbn.com