Kawad-on

Kaadlawon pa naglinya na ang mga mamalitay og bugas sa National Food Authority nga gibaligya sa tindahan sa Marakas nga ang tindira labing seguro naghagok pa tungod kay alas kuwatro pa. Ang maong talan-awon mao usab ang atong makita sa nagkalain-laing dapit dinhi sa Sugbu ug sa ubang dapit sa nasud.

Ang ka taas sa linya, ang katugnaw sa kaadlawon ug ang kainit sa adlawan wa baliha ug giagwanta lamang sa mga mamalitay tungod kay ang NFA lang nga bugas ang mapalit sa nagnihit nga kuwarta. Ambot, nalingaw ba kaha ang atong mga lider sa nasud nga nagsud-ong sa dagway sa mga kabus nga naglinya pagpalit sa bugas sa NFA nga barato?

Ang kataas sa linya sa mga mamalitay sa bugas sa National Food Authority sa bisan asang dapit sa nasud naghulagway kini sa kataas na usab sa linya sa mga kabus dinhi sa nasud. Salamat na lang nga kitang mga kabus aduna pay mapalit nga bugas nga barato.

Pero unsa kahay mahitabo kanato kun mahurot na ang baligyang bugas sa NFA, aduna pa kaha kitay makaong mga kabus? Sa ka mahal na sa bugas ug ubang palaliton ning panahona makakaon pa kaha kitang mga kabus? Dili kaha kita mapariha sa Haiti nga nangaon na lang ang mga tawo didto og lapok?

Ang kalapad karon sa mga kabus sa nasud naghulagway lamang kini sa kapakyas sa atong gobiyerno sa pagpalingkawas sa katawhang kabus gikan sa gapos sa kawad-on. Dagway kini sa kataphaw sa mga tubag sa gobiyerno sa suliran sa kawad-on.

Ang labaw sa International Monetary Fund mipasidaan na sa posibleng gubat nga mahitabo kun ugaling dili mahunong ang pagsige og saka sa presyo sa mga palaliton. Manghinaot lang ta nga di ni mahitabo. 

Subo kaayong palandungon nga usa ka amahan ang misugo sa iyang minor de edad nga anak sa pagpamaligya og ginadiling drugas.

Ang amahan nga manalipod unta sa iyang anak gikan sa drugas ug ubang illegal nga buhat mao na hinoon ang nagtukmod niini nga malambigit sa dautan nga buhat. Labing seguro aduna pa dihay laing amahan ug mga ginikanan nga nagpahimulos sa ilang mga minor de edad nga anak.