"Good day. Bahin nianang pagpanukli og candy, daghan pod ang naghimog ingon niana diri sa Ormoc. Ako kapila na maka-encounter niana." -- 0909-2943294 (Sent: 01:58:53pm--March 6, 2008)
Daghang salamat sa kasayoran nga imong gidapangat, higala. Siyento porsiyento ang akong pagtuo sa imong text kay ako mismo nakadiskobre nga may naghimo na niining shortchanging sa bisan asang lugar. Dako kining binuang sa mga tindahan.
Didto sa Mabini, Bohol, ako mismo nakasaksi sa paghimog shortchanging sa usa ka gasoline station ngadto sa driver sa habal-habal nga akong gisakyan. Imbes kuwarta ang isukli, candy na hinuon ang gihatag sa cashier ngadto sa driver nga nagpatubil.
* * *
"Ug kon wa gyoy P0.50, di na lang suklian," nagkanayon pa ang gasoline boy nga maoy nagtunol sa sukli sa habal-habal driver nga niangal.
"Katungdanan ninyo ang pag-andam og sensilyo nga igsusukli," ako'y mitubag sa gasoline boy kay naglagot ko. "Ang candy dili legal tender isip sukli kay usa kana ka matang sa butang nga palitonon. Kuwarta ray matawag nga sukli."
Kini gong shortchanging gi-discourage sa DTI. Mao nga kun kamo maka-encounter og panghitabo nga ingon niini, ayaw palabya ang higayon. Reklamo kamo ngadto sa tindahan nga naghimog shortchanging. Ug kon dili tagdon ang inyong reklamo, dad-a ang inyong complaint ngadto sa buhatan sa DTI.
* * *
"Good day, Sir. Kanang mga timbangan diha sa merkado sa Opon sa Lapulapu City mga tikasan. Kana lang section sa isdaan, tagsa ka gramo gyod ang kulang sa ilang kilohan diha. Kadaghan nako mabiktima diha. Halos tanang negosyante diha kulang og kilohan ang timbangan. Samot na ang baboyan ug manokan hangtod na sa ubang mga produkto nga gamiton og timbangan. Way pakabana ang tagdumala diha.'' -- 0916-9062111 (Sent: 12:18:39 pm--February 16, 2008)
Atong sangpiton ang atensiyon sa market administrator sa Opon sa pagsubay niining sumbong sa atong texter. Susiha kini ninyo, Sir, aron dili magpatuyang sa ilang gibati kanang tikasan nga mga negosyante.
* * *
(Sumbong ug reklamo? Text sa 0910-8105522)