Nihit sa humay

Nabalaka na ang Simbahang Katoliko Romano sa pagka-usab sa panglantaw sa katawhan unsay “mortal sin.” Kini ang hinungdan nganong ang Vatican mi-isyu og komunikasyon aron ipahibalo ang bag-ong mga salang mortal.

Naapil sa bag-ong lista sa mga salang mortal ang paghugaw-hugaw sa kalikupan, naghinobrang katigayonan ug paghatag og kalisud sa ubang tawo. Aduna pay daghan.

Apan sa pagkakaron, ang maong mga sala nagdepende na unsay interpretasyon sa tawo, ilabi na niadtong mga “Christian by convenience.”

Mao bitaw nga midaghan karon ang mga kurakot tungod kay lahi ang ilang paglantaw sa sala.

Adunay kusog manghilabot sa dili ilang butang, sama sa pagpangawkaw sa panudlanan sa gobyerno ug ubang matang sa korupsiyon, apan kun imong tan-awon ilang kinabuhi hilabihan nila ka-aktibo sa mga kalihukan sa Simbahan unya kanunay pa nga mo-sponsor og mga kalihukang relihiyoso.

Timan-i hinuon nga dili nato ma-huwesan ang atong isigka-tawo. Ang Ginoo lamang ang nasayod unsay sala ug unsay dili.

Apan maayong ibutang sa atong hunahuna nga adunay mga binuhatan ug hunahuna nga wala makapasar sa kasugoan sa Dios. Kana maoy sala sumala sa atong tanlag.

Kun tulisokon na gani kita sa atong tanlag nganong nagbuhat kita sa ingon, kita na ang maigo nga mosibog sa atong gibuhat o gihunahuna.

* * *

HUMAY. Mabasol ba ang Malacañang niining padayong pagmahal sa bugas humay karon?

Ang bugas nga tag P20 ngadto sa P22 mapalit na karon og P24 ngadto sa P26 matag kilo. Alang namong mga pordoy, ang dugang dos pesos matag kilo usa na ka dakong palas-onon, ilabi na niadtong wala gyud intawoy tarong nga pangita.

Apan si Pres. Gloria Macapagal-Arroyo nakaako pa sa paglikay-likay sa tinuoray nga isyu nganong nagmahal ang presyo sa humay sa kamerkaduhan.

Kanunay nga gipahibalo, pinaagi sa iyang mga tigpamaba, nga walay krisis sa bugas humay sa nasud, bisan ang mga tawo naglisud na sa pagkumpleto sa usa ka kilo tungod sa dos pesos nga deperensiya.

Nganong dili naman lang itug-an sa Malacañang ang tinuod nga nagnihit karon ang bugas-humay hinungdan nga nagmahal .

Hain naman ang ubang mga opisyal sa kagamhanan? Moduyog lamang kamo sa pangulipas sa presidente nga walay krisis sa humay sa Pilipinas?

Mo-uban ko sa pangasaba ni Senador Mar Roxas ngadto sa presidente tungod kay dili angayang ipakagamay ang maong krisis tungod kay naghisgot kita og nag-unang pagkaon nga kun wala kana sa mga lamesa sa mga banay’ng Pilipino, mabutang sa kagutom ang Pilipinas.

Suportahan nato ang food summit nga giduso ni Mar Roxas. Sa akong nakita, kini lamang ang paagi nga mahibaw-an nato unsay problema, masusi nato unsay ugat sa problema, ug mapangitaan nato og solusyon ang maong problema.

Ang wala nato mahibaw-i tingale mao ang dakong suliran nga gisagubang karon sa nasud sa Vietnam, ikatulong nasud nga labing dakong importer og humay sa kalibutan.

Ang International Rice Research Institute mibutyag nga ang mga mag-uuma sa Vietnam naproblema karon sa pag-atake sa peste ug virus sa ilang mga pananom nga humay.

Gani gikahadlokan pa nga mokuyanap sa mga silingang nasud ang peste sa kahumayan sa Vietnam. Kun mao na kuyaw usab ang mga kahumayan sa Cambodia, Thailand ug China.

Walay maayong laki sa peste. Kini maoy hinungdan nganong mogamay ang suplay sa merkado.

Kun monihit gani ang suplay sa merkado, siyempre ang prinsipyo sa subject nga economics 101 sa kolehiyo nagkanayon nga motaas ang presyo.

Ang pagtago-tago sa kamatuoran dili makatabang pagsulbad sa pagnihit sa bugas-humay sa kamerkaduhan. Kay kita man tanan ang mangaon og humay, angayang kitang tanan ang manginlabot niini pagkab-ot og maayong solusyon.