Honesty

Sama sa pulong gugma, love ba, giuran-uran na lang pod nato ang pulong honesty. Giuran-uran na lang, sa ato pa, giabusahan, ug wa nato puy-i ang kahulogan niini.Sa mga tulomanon sa telebisyon, sa mga drama sa radyo, ug sa mga salida sa sine, naghitak ang paggamit sa pulong gugma. Apan, simultaneously, anaa ang violence, ang pagluibay, ang pagpanghimaraut, ang dumtanay, lakip na ang pagpatay – in the name of love. Love?

Love ba god nang mag-ilis-ilis lang og mga bana ug asawa? Mora lag mag-ilis og medyas o bra? Unsa ning klasiha sa love? Unya, kun unsay mahitabo, ang Ginoo maoy pasanginlan. Moy gidangat!

Sa natad sa politika, mao sad ni ang nahitabo sa pulong honesty! Kun atong paminawon ang atong mga lider, honest silang tanan. Taliwa sa naangkon natong notoriety nga kita ang labing hugaw, labing corrupt nga nasud dinhi ning suoka sa kalibutan, moinsistir pa sila nga honest kitang mga Pinoy.

Mao nga sa ilang mga public appearances, sa mga press releases ug mga speeches, honest silang tanan. Supak sila sa corruption. Nindot paminawon. Pakpak dayon ta.

Nakaila mong Burt Lancaster? Lagmit wa na. Kun kinsa man karon ang paborito ninyong mga action star, mao kini si Burt Lancaster sa among panahon. Usa ka Oscar awardee, ambut ka-pila? Ug kasagaran sa iyang mga salida sa sine mga box office hits.

Usa sa labing memorable nga hitabo sa iyang kinabuhi mao kadtong bata pa siya, pobre nga bata, mga 12 years old, sa New York City, diin sa iyang paglaroy-laroy, usa ka adlaw, nakapatid siyag $20 bill, duol sa usa ka bangko.

Gidali niyag punit ug maoy milingaw sa iyang hunahuna ang mga paborito niyang makaon nga mapalit. Ug ang kalipay sa iyang inahan sa nakit-an niyang kwarta. Niadtong panahona (bisan gani karon alang kanatong mga Pinoy), daku na kaayo ang maong kantidad alang sa usa ka bata.

Nakalit siyag kaminghoy sa diha nga usa ka tiguwang babaye, naghilak, ang miduol kaniya ug nangutana kun wa ba siya makakitag $20 bill. Katug-anon siya, kadiliin pod. Apan, maoy mipatigbabaw ang iyang pagka-honest, taliwa sa ilang kakabus nga nagkinahanglan kaayog kwarta.

Diha na ang kwarta, iya nang nagunitan, nasulod na sa bulsa, apan, gumikan sa iyang pagka-honest, iyang giuli sa tiguwang. Mahimo kaha ni nimo, Dro? Makabalibad kaha ka Dro, kun tunulan kag sobre? Kun akoy imong pangutan-on, Dro, segun sa gibag-on sa sobre!