EDITORYAL - Prayer rally ba kadto?

Ang giingon nilang interfaith rally nga midani og libuan ka mga tawo didto sa Makati City adtong miaging Biyernes ang gikuwestiyon sa daghang tigpaniid: “Relihiyosong rally ba kadto o politikal?”

Gipasupot ang maong pangutana tungod kay matud sa uban gihimo lang nga morag paon ang ngalan sa Ginoo apan ang tinuod mao nga usa kadto ka politikal nga kalihukan tungod kay daghang politiko ang nanambong ug gani kining maong mga politiko nagkontesay lag pangataki sa gobiyerno ug ni Pangulong Arroyo.

Matud pa sa usa ka Sugbuanong pari nga didto sa maong rally,” “It was supposed to be a prayer rally but there were more hateful political talks than prayers during the occasion.”

Sa sunod nga lihok protesta maayo tingali nga klarohon sa mga tigpasiugda ang matang sa maong kalihukan -- alang ba sa pag-ampo o alang ba sa pagpangataki sa gobiyerno.