“Sila ray magbuot. Ang mga taga-Manila ray mopadesilya, mopademano sa atong nasud.”
Mao kini ang atong madungog kasagaran sa mga lumolupyo sa mga lagyong probinsiya ilabi na ning panahona diin ang mga taga-kaulohan maoy saba kaayo sa ilang demanda nga paresaynon ang pamuno nasud.
Matud nila -- matud niining mga nangreklamong probinsiyano -- ang tingog ra sa taga-Manila ang madungog. Ug gidungog.
Ang tingog sa mga promdi pinaagi sa ilang rali-rali mora lag way naminaw. Kini suma usab sa mga politikanhong lider sa mga lalawigan.
Paminawon sab unta ang tingog sa mga taga probinsiya. Di na ta maghuwat pa nga sila mag-wild nga morag huramentado aron madungog ug hatagan usab og kamahinungdanon ang ilang tingog.