EDITORYAL — Bantay Bayan laban sa katiwalian

MARAMING magandang nangyari mula nang lumantad si Rodolfo Lozada Jr. bilang testigo ng maanomalyang national broadband network (NBN). Mas marami ang nakikisimpatya kay Lozada sapagkat naibulgar nito ang iba pang kontrata ng gobyerno na overpriced pala. Ayon kay Lozada, 20 percent ang pinapatong sa mga proyekto ng gobyerno para magkamal ng malaking komisyon ang mga opisyal na matatakaw sa pera. Kung noon ay marami ang nagulat sa biglang paglantad ni Joey de Venecia, may-ari ng Amsterdam Holdings at ibinulgar ang panunuhol ni dating Comelec chairman Benjamin Abalos, mas marami ang nagulat pero humanga kay Lozada. Nakikita kasing credible witness si Lozada at walang gaanong bahid kaysa kay Joey de Venecia na may pansariling interes kaya lumantad noong nakaraang taon. Nasaktan si Joey de Venecia makaraan ang ZTE Corporation ng China ang paboran para mag-pondo sa NBN project kaysa sa kanyang kompanyang Amsterdam’s Holdings. Sinusuhulan umano siya ng dating Comelec chairman ng P10-milyon para umatras sa bidding. Sinabi pa ni De Venecia na kikita si Abalos ng $130-milyon sa ZTE/NBN deal. Itinanggi ni Abalos ang paratang ganoon din naman ang pagbabanta umano nito kay Lozada na papatayin.

Maganda ang nangyayari sa paglantad ni Lo-  zada sapagkat maraming grupo na ang nagbaba-    lak na magbuo ng samahan para mag-audit sa mga pinapasukang kontrata ng gobyerno. Kung mag­kakaroon ng grupong mag-aaudit sa mga pro­yektong overpriced ang halaga, mababawasan na ang malalaking komisyon na kakamalin ng mga matatakaw.

Isinusulong ng mga civil society groups ang     “Independent Citizens Debt Audit Commission” para magsagawa ng pagsisiyasat sa mga kontrata ng gobyerno. Sinabi ng Freedom for Debt Coalition (FDC) at ng People Against Illegitimate Debt  (PAID) na ang pagbubuo ng independent commission ang makapipigil sa mga katiwaliang nagaganap sa kasalukuyan na katulad ng NBN deal na si Lozada nga ang naglalantad sa kasalukuyan.

Maganda ang balak na ito para mapigilan ang walang katapusang pagnanakaw sa pamahalaan. Isang malayang commission ang dapat para mapi­gilan na ang mga matatakaw na pinatutunayan ni Lozada sa kanyang testimonya.