February 12, 2008 | 12:00am
Lig-on ug katuohan ang mga gibulgar ni Rodolfo Lozada nga mga kasayoran atol sa gipahigayong Senate investigation sa nakanselar nga National Broadband Network Project nga nakuha sa ZTE Corporation nga taga China. Tipik sa gitug-an ni Lozada mao nga sa iyang pagtuon sa proyekto nagkantidad lamang kini og 262 milyones dolyares ug ang 130 milyones dolyares niini maoy gustong kuhaon ni Ben Abalos nga komisyon. Ug sa dihang iyang gibalibaran nagpakitabang kini ni First Gentleman Mike Arroyo. Gisumbong niya si Abalos ngadto sa iyang amo nga si Romulo Neri tungod sa gihimo niini ug gimandoan siya sa pagpaminos sa kahakog ni Abalos. Daghan pa siya og gipangbulgar nga mga anomaliya sa kontrata sa NBN nga proyekto pero dili na lang nako tagsa-tagsaon kay limitado kining atong espasyo. Ang masulti ko lang lig-on ug credible ang testimonya ni Lozada apan wa lang kini magtumbok direkta ngadto ni Presidente Gloria Macapagal Arroyo ug kausa ra pod niya mahisguti ang pangalan ni First Gentleman Mike Arroyo nga adunay kamot sa anomalosong proyekto. Busa ang maong testimonya nanginahanglan pa kini og lain pang kasayuran nga mopalig-on pagmaayo sa mga naluwatan na ni Lozada. Ako nagtuo nga si kanhi NEDA Director General Romulo Neri maoy makapuno sa mas makabungog pang kamatuoran mahitungod sa NBN nga proyekto. Sa akong pangagpas ang mga kasayuran nga gihuptan ni Neri nga lisod tagoan mao ang hinungdan kun nganong dili na siya mobalik sa Senado kay mahadlok nga maapiki ug makatug-an unya sa tanan niyang nasayran. Karon nga migawas na ang iyang higala nga si Lozada ug mibulgar sa tanan niyang nasayran sa anomalosong proyekto, mosunod na kaha si Romulo Neri? Mosunod siya ni Lozada kun aduna pa siyay konsensiya.
* * *
Sa imbestigasyon nga gihimo sa Senado dili malimtan si Romulo Neri sa paborito niyang tubag - Privilege communication your honor, ilabi na kun pangutan-on na siya kun unsa ang ilang gipanagsultian sa Presidente. Tinuod nga dili puydeng atong ilad-lad ang privilege communication, apan ato bang tugotan nga malubong ang kamatuoran tungod lang niini? Dili na ba lang nato hatagan og kahigayonan nga makatoyhakaw ang kamatuoran nga maoy gipangita sa uhaw nga katawhan tungod lang sa privilege communication? Makonsensiya ka na unta Mr. Neri! Masilsil na unta sa imong alimpatakan nga dili ang presidente maoy nagsuweldo nimo.
