Ombudsman accreditation sa Afrena 7 ug sa Senior Citizens

Sa tinguha nga kahatagan og dugang kusog ang mga paningkamot sa kagamhanan, pagsanta sa korupsiyon nga karon nagka-grabe, ang Ombudsman mipasiugda sa Corruption Prevention Unit (CPU) Program, diin ilang i-tap ang bulig sa mga non-governmental ug people’s organization sa ilang pakigbisog batok sa graft and corruption.

Mga katuyoan ug tumong sa PCU: 1) To raise public awareness on the evils of corruption and the means of fighting the same. 2) To act as “eyes and ears” of the Ombudsman and establish CPU Community Public Assistance Centers. 3) To ensure and broaden community-based participation in the drive against corruption and inefficiency in the government.

Pinasikad sa maong mga katuyoan, ang Ombudsman for the Visayas, nagpasiugdag mga orientation-seminar alang niadtong mosanong sa maong hagit. Gumikan niini, ang Association of Former Regional Executive of National Agencies dinhi sa region 7 (AFRENA 7), ug ang Regional Federation of Senior Citizens Association of the Philippines sa region 7 (RFSCAP 7) gi-accredit sa Ombudsman, tapus sa orientation-seminar nga gihimo.

Sama sa ubang mga na-accredited na nga mga non-governmental ug people’s organization, ang AFRENA 7 ug ang RFSCAP 7, sa giingon ni Deputy Ombudsman for the Visayas, Hon. Pelagio S. Apostol, ang maong mga kahugpungan nahimo nang mga  partners sa Ombudsman pagpakigbatok sa corruption.

Ang Memorandum of Agreement gipirmahan tali nila ni Deputy Ombudsman Apostol ug kanhi Customs Collector David S. Odilao, Jr., presidente sa Afrena 7, ug Labangon Barangay Captain Felix D. Abella, presidente sa RFSCAP 7. Si Abella usa sa mga Director sa Afrena 7, isip kanhi regional director sa Bureau of Lands.

Sa iyang pamahayag si Odilao miingon nga subay sa motto sa Afrena 7 nga “Public service is a lifetime commitment,” ilang gidawat ang hagit sa Ombudsman pag-“put into action:” sa maong commitment. “Among ampingan kining maong accreditation nga gisangon kanamo sa Ombudsman, uban sa tinguha nga makatampo kami sa mga paningkamot sa kagamhanan, paglinis sa bureaucracy ug paghatag sa usa ka maligdong nga pag-alagad ngadto sa katawhan,” nagkanayon si Odilao.

Kun magbinantayon ang matag usa kanato, Dro, di gyud unta kaugpo ang atong kaigsoonan sa gobiyerno nga dalikdikon og mga hunahuna. Di ba?