EDITORYAL - Good luck sa A-Shot

Ang Cebu City Police Office gikatahong mimugna og special anti-gang units diin ang tumong niini mao ang pagpakigbatok sa mga badlongon sa kadalanan sama sa mga sakop sa kuwestyonabling mga fraternity ug mga gang sa mga armadong bugoy.

Ginganlan kini ni Cebu City police chief Patrocinio Comendador nga Anti-Street Hoodlums Operating Teams kon A-Shot.

Mao kining positibong tubag sa kapolisan sa mga reklamo sa mga lumolupyo sa siyudad batok sa mga abusadong sakop sa fraternity ug mga street gang.

Masaligon si Comendador nga magmalampuson kining iyang A-Shot sa pagkab-ot sa tinguha niini nga masulbad na ang kasamok nga sa dugay nang panahon nakatay-og sa kalinaw unta sa dakbayan.