Halos tanang kongresista nga mipasabot sa ilang boto sa pagpabakante sa lingkoranan ni Speaker Joe de Venecia misinggit og kausaban. Sa paglingkod ni Prospero Nograles isip bag-o nga Speaker sa Ubos Balay Balauranan iyang giingon nga himuon niya ang reporma aron mahibalik ang respeto sa katawhan sa atong Ubos Bay Balauranan. Ang dakong pangutana kun unsa nga reporma ang iyang pagahimuon ug unsang kausaban ang buot ipasabot sa mga kongresista nga nagbalik-balik sa paglitok sa pulong nga kausaban sa dihang ilang gipasabot ang ilang buto sa pagtangtang ni JDV.
Klaro ug tataw nga ang pulong kausaban gigamit lamang sa mga kongresista alang sa paglingla sa katawhan sa tinuod nilang katoyuan ug sa katuyoan sa mga anak sa Presidente nga mga kongresista nga maoy nagpasiugda sa pagpalagpot ni JDV tungod sa kapakyas niini sa pagpugong sa iyang anak sa pagbulgar sa dakong panapi sa mga Arroyo niadtong wala madayon nga ZTE nga kontrata. Mabaw lamang nga kausaban ang ilang tuyo -paghulip lamang sa pangalang Joe de Venecia ngado sa pangalang Prospero Nograles isip bag-ong speaker ug dili ang pagpalingkawas sa ubos bay balauranan gikan sa mga kamot sa Malakanyang nga padayong mituok sa ilang ilog, dili ang pagpalingkawas kanila sa pagka itoy gikan sa Malakanyang ug dili ang pagkalutas kanila sa anay nga nagpuyo sa Malakanyang. Ang kausaban nga gisinggit sa mga kongresista kausaban lamang sa liderato ug dili kausaban sa dagway sa kaniadtong institution nga ilang gihimong basurahan. Kang Speaker Boy Nograles ning imong paglingkod isip bag-ong Speaker, unsa nalang kahang parte sa imong lawas ang wa mahigti sa Malakanyang? Anaa pa ba? Pagkalooy sa mga Pilipinhon nga nakabaton og mga magbabalaod nga giganahan sa ilang pagka itoy.