Lubag sa DPWH

Gihunong kagahapon sa CITOM ang ilang gihimong dry-run sa odd-even scheme nga maoy ilang nahuna-hunaan nga sulbad sa mosamot ka grabe unya nga kahuot sa dagan sa trapiko sa may Banilad-Talamban area nga maapektohan sa pagatukoron nga fly-over sa nahisgutang dapit. Gihunong sa CITOM ang ilang gihimong dry-run tungod kay grabe kaayo kahuot ang trapiko sa mga dalan nga ilang gihimong alternatibo nga rota sa mga sakyanan nga nagagikan sa Banilad ug Talamban area. Sigon sa taho, migrabe ka huot ang dagan sa trapiko sa alternatibong dalan kana gumikan sa kadagko sa mga libaong niini nga maoy gilikay-likayan sa mga nagmaniho sa sakyanan nga nahadlok nga mahibilin unya ang ilang ligid o ba kaha pisa sa ilang gimanihong sakyanan. Lutaw gihapon ang kadagko sa libaong sa maong mga dalan bisan pa man kun gipasalig na sa taga DPWH ang pag-ayo niini ug gani kaniadto pang miaging semana nila gisugdan ang pag-ayo niini. Ang dry-run nga gipahigayon sa CITOM pasiuna pa lamang kini sa grabe unyang kahasol nga matagamtaman sa mga taga Banilad ug Talamban ug sa mga dumudoong ning dapita.

* * *

Atong gihangop ang pagtukod sa Banilad-Talamban fly-over tungod kay mao kini ang nahuna-hunaan sa CITOM ug dakbayan nga sulbad sa huot nga trapiko sa maong dapit apan dili upod seguro angayan nga ipamugos sa DPWH ang pagtukod niini sa Pebrero uno kun dili pa gayod preparado ang tanan. Naglibog lang ko kun  nganong ipamugos gyud sa taga DPWH ang pagsugod sa trabaho sa fly-over nga unta sayod man sila nga wa pa nila mahuman sa pag-ayo ang mga libaong nga dalan? Unsa bay gidalian sa DPWH, ang commission? Ang pagpamugos sa DPWH pagsugod sa pagtrabaho sa Banilad-Talamban fly-over usa ka matang sa pagpanglubag ngadto sa katawhan nga apektado sa grabe gyud unya ka huot sa trapiko. Gibaliwala lang ning maong buhatan ang kahasol sa katawhan kay maoy gipalabi ang daling pagkuha seguro sa SOP ning maong proyekto?