Ang Dios Miingon Pamalandong Matag Domingo

Enero  27, 2008. Ikaduhang Domingo sulod sa tuig (National Bible Sunday)

Mga Pagbasa:  LIs. 8:23-9:3/Sal. 27/1Cor. 1:10-13,17/Mt. 4:12:23

Ug gibiyaan nila ang tanan

Daghan ang nagkanayon nga basta batan-on pa gani ang usa ka tawo, puno gyud siya sa mga ideyalismo. Maningkamot gayud aron n sa tinud-anay ug sa mas halawom nga paagi pagapuy-an ang maong ideyalismo bisan kun kini nagkahulogan og pagsupak sa mga tawong kanhiay anaay ideyalismo apan niuban na lang sa bul-og sa reyalismo.

Ingon usab ang atong pagsunod sa mga tunob sa atong Ginoo. Unsaon man nato pagtakdo ang giingon nilang “detachment” sa bisan unsang butang o tawo nga makababag sa atong pagtuman sa misyon nga kanato gitahas.

Ang mga yanong mananagat gitawag alang sa linaing bulohaton. Ilang gibiyaan ang ilang mga sakayan usa ka tabunok nga simbolismo sa pagtalikod bisan na gani sa ilang kaugmaon o naandang bulohaton. Mi-risgo sila bisan pa man sa buhing matuod nga sila sa unang pagkabutang, kulang ug dili takos sa maong buhat.

Sa atong kapanahonan karon, dili man kinahanglanon ba nga mobuhat kita og mga dinagko aron ingnon sumusunod ni Kristo. Hinunoa, nagpasabot kini’g paghimo sa Dios ingon nga first priority sa atong kinabuhi dili ba? Sa akong pagtagik niining maong pamalandong ako  usab nakapangutana sa akong kaugalingon: “Ako pa ba kahang gipaningkamotan ang pagpuyo sa akong mga ideyalismo sa dihang ako misulod sa seminaryo o naghinobra lang ba kaha ang pagsanong sa reyalismo nga tungod niini gihiklin ko ang ideyalismo?”

[email protected]