Musikang Sugbuanon

Sa makausa pa, ang musikang Sugbuanon misidlak na sab niadtong miaging mga kontes sa kanta sa Metro Pop ug sa Huninyo. Padayon nga panghingusgan sa mga kadagkoan niini ang pagpatunhay sa atong musika bisan kun ang commercial value niini nagpadayon usab nga wala mosaka.

Dili malalis nga daghan kanato ang ganahan magkanta kanta sa mga musikang local. Kantahon nato samtang aduna kitay gikuri kuri, naligo, nanilhig, nagluto, o dili ba magpahayay lang. Mas dali kantahon kining maong mga kanta kay natural kini nato nga expression sa pagbati. Pananglitan, ang iningles nga kanta nga hiphop o disco lami kun atong sayawon, apan morag lisud litokon kun ato nang kantahon. Hinoon, kasagaran sa mga mokanta alang sa pasundayag mas mopili pa gihapon sa mga kantang iningles ug Tinagalog sa ilang repertoire. Apan bisan sa mga tapok-tapok, wala gihapon maluma ang Matod Nila ug Usahay.

Ang akong manghod, niadtong nagtungha pa siya sa Ateneo de Manila University sa iyang Masters in Mathematics, nagbawon bawon intawon tog cassette tape sa mga kantang binisaya. Iyang paborito ang mga kanta ni Max Surban ug Yoyoy Villame nga makapawala sa iyang kalaay. Ang iyang kauban sa dormitoryo naapil ug kalingaw kun magkanta kanta sila niini.

Ang mga gagmay nako nga pag-umangkon kaniadto hapit ma memorize ang mga kanta sa CD sa komposisyon sa akong magulang nga mga lunlon binisaya. Ang akong pirmi kanta-kantahon mao kadtong komposisyon sa akong magulang nga gikanta ni Sheryn Regis. Gani hangtod karon, magpatukar tukar pa man ko sa maong CD kon wala koy lingaw sa balay. Dili sa ingon nga dili ko ganahan sa kantang iningles. Ganahan gihapon kog mga kanta bisag di ko kasabot sa lyrics, sama sa The Prayer ni Josh Groban ug Charlotte Church nga dunay sagol Italyano, ang La Vie En Rose ni Grace Jones nga lunlon French ug ang Butsikik ni Yoyoy Villame nga walay klarog unsang lingwahia. Apan mas lami dimdimon ang kantang binisaya.

Adunay moingon nga baduy ang tawong mokanta ug binisaya o Tagalog. Alang kanako, mas baduy ang magkanta-kanta og iningles nga kanta bisan kulang sa musicality ang maong kanta, aron lang ingon nga “class”. Wala sa sinultihan ang pagka “class” sa musika, kay ang musika mismo mao ang gitawag nga universal language.

Alang sa inyong mga panahom, palihug email sa [email protected]. Daghang salamat.