Text scam nasab

Makadaghan na kita makadungog mahitungod sa text scam diin maoy gamiton sa mga mangingilad ang ngalan sa PCSO, ABS-CBN, Phil. Charity Foundation, GMA Foundation, ugbp., aron makailad sila sa ilang prospective victim. Ang maong mga buhatan ug institusyon mipasidaan na nga dili tubayan si bisan kinsa nga mopatuong konektado ngadto kanila sa tuyo nga makailad.

Kay wala na tingali mosalir ang paggamit nila sa ngalan sa PCSO, ABS-CBN, PCF, GMA Foundation, ugbp., lain na usab nga ngalan ang ilang gihimong front sa ilang pagpangilad. Mao na usay ilang gigamit sa cellphone number 0910-8217672  ang mipahibalo kanato niining maong estilo sa modus operandi kay siya mismo nakadawat og congratulatory message gikan sa numero sa cellphone nga wala ma-phonebook sa kaugalingon niyang C.P.

Ang text nga iyang nadawat nagkanayon: “Good day. Congratulations! Your mobile number has won a charity prize from the Remittance of OFW-PCMC last November 26, 2007. Call me up now for more details. I’m RJT (inisyal).”

Maayo gani kay wala magpatonto ang atong texter. Wala gyud siya mailad. Pero nasayod ko nga ang tanan dili sama kagahi ilaron sa atong texter busa ako mopasidaan nga pagbantay kamo niining maong matang sa tinonto.

* * *

“Good am, Sir. Nalipay ko naghisgot ka sa imong lindog bahin sa sukli nga kulang. Sakto gyud ka sa imong opinyon bahin ana, Sir. Ako usa ka cashier sa carenderia diri sa may Happy Valley. Mosukli gyud hinuon kog tarong kay nagtarong ug sakto man pod ang ilang gibayad. Pero naa gyuy panahon usahay nga mahutdan ko og sensilyo nga ipanukli maong mohangyo ko nila nga candy na lang ang isukli. Kun dili mosugot ang kustomer, mapugos gyud kog pangitag sukli.” -- 0929-2119400 (Sent: 08:57:15am-- November 29, 2007)

Nindot unta kun sama pa nimo ang ubang mga cashier nga manghangyo pa sa kustomer bahin sa sukli nga candy. Baya na man kanang uban nga modiretso lag tunol og candy unya nagkusmod pa gyud ang mga dagway.

* * *

 (Sumbong ug reklamo? Text sa 0910-8105522).