Tao’y disiplinado

Kami ay nagb’yaheng palabas ng bansa

Ang tinungo namin ay lupang sagana;

Doon ay masaya at laging payapa

At ang mga tao ay may disiplina!

Singapore ang bansa na aming nasapit -–

Kay ganda ng lugar at napakalinis;

Kay luwang ng kalye at sa mga gilid

May halama’t puno na kaibig-ibig!

Magmula sa airport at hanggang sa lunsod

Walang makikita kahi’t isang billboard;

Di katulad ditong kinumers’yal ang roads

Kaya kung may bagyo ay nagiging salot!

Nang aming marating ang pusod ng s’yudad,

Kay lalaking building sa ami’y tumambad;

Saka nang gumabi ay nagliliwanag –

Mura ang kuryente -– may ilaw ang lahat!

Ilang araw kami roon sa Sentosa

Ang pook na iyon ay pasyalan pala;

Doon ay may bird show na kahanga-hanga

Pagka’t mga ibon sumasayaw, kumakanta!

Doon ay sinakyan bantog na cable car

At saka nakita elepanteng nagsasayaw;

Gayundin ang dolphins na napakagaslaw

At pati ang fountains – iba’t-ibang kulay!

Kahanga-hanga ring doo’y panoorin

Ang underwater world -– aliw sa paningin:

Isdang maliliit, barakuda’t pating

Paikut-ikot lang sa lawang salamin!

Ah kung tayo lamang ay mayro’ng ganito

Itong ating bansa’y tiyak ang asenso;

Sa dami ng mga tanawing magarbo —

Mamamayan nati’y maraming trabaho!

Sa naturang bansa’y kay sarap mamasyal

At kung p’wede sana’y habambuhay na lang;

Sapagka’t natantong sa nasabing lugar

Walang nagra-rally –- walang kaguluhan!

Doon daw ang sabi parang walang Pasko

Pero Paskong lagi sa dami ng tao;

Mga pamilihan ay walang peligro

Walang nandaraya, walang nanloloko!