Bisan og unsaon pagbadlong, sigurado ko nga gahi g’yod og ulo ang katawhan nga magpataka lang gihapon og labay sa ilang mga sagbot diha sa parade route atul sa Sinulog mardigras karong adlawa.
Usa ka basurero nga sakop sa Department of Public Services (DPS) mitug-an nako nga sa nangaging katuigan makatigum sila og tagpila ka trak sa mga basura diha lang sa parade route. Grabe no?
Sari-sari lang nga matang sa basura. Layo ra kaayo ang posibilidad nga kadaghanan sa mga tawo motuo sa awhag nga sila adto molabay sa ilang basura sa tukmang lugar.
Batasan g’yod tingali kini sa mga Filipino kay unsaon nga kun dunay balaud wala may hugot nga pagpatuman, mao nga naanad sila. Aw hinoon, sa ubang dapit sa nasud kun dunay mga festival, daghan man hinoon gihapong sagbot.
* * *
Tungod sa pagpasagad o kaha pag-abuso sa ubang kawani sa City Hall ingon man sa lainlaing barangay, nausik ang mga P240,000 nga kwarta sa kagamhanan sa dakbayan matag buwan.
Mao kini ang kantidad – kaha subra pa gani tingali — nga gisweldo sa kapin sa 40 ka kawani nga gidistino aron lang manilhig og manglimpyo sa South Reclamation Project nga karon gibunyagan na og South Road Properties.
Ang ilang trabaho mao ang pagsilhig sa mga sagbot nga magpasad matag karon ug unya diha sa karsada sa SRP. Unsa kini nga mga sagbot? Sagad mga sagbot kini nga mahulog gikan sa mga garbage trucks.
Nganong mangahulog man gikan sa mga truck sa basura? Buyno puno tingali g’yod ang mga garbage trucks. Buyno, bisan og dili pa kayo puno ang truck apan manglupad gihapon ang ubang basura kay wala may tabon.
Dunay lagda nga gilatid alang sa mga kawani nga gidistino paghakut og basura nga tabonan g’yod unta nila ang mga sagbot og “net” o kaha trapal.
Ang tumong niini mao nga aron ang ubang basura dili manglupad sa hangin o kaha dili mahulog ang mga sagbot. Sayonan ka nga usahay duna may mga sinakong sagbot nga mahulog.
Nahinabi nako si Engr. Diony Gualiza, ang hepe sa Department of Public Services (DPS) ug iyang gibutyag nga dugay na kining maong lagda nga gimando nila apan duna g’yoy mga gahi og ulo.
Matud pa ni Engr. Randy Navarro, ang hepe sa Inayawan Sanitary Landfill nga duna g’yoy mga drayber nga kusog kaayong magpabadlong. Angay na tingali nga pitolon ang baliko nga batasan niining maong mga kawani.
Ang higala nako nga si Vicente Dejoras Jr. nga maoy gitudlo nga pangulo sa 40 ka kawani nga gidistino pagpanglimpyo sa SRP, wala malipay sa gihimo sa maong mga kawani.
Ikaduha na nako kining hisgot ning maong isyu kay ang report kanako ni Jun Dejoras nga wala lang gihapon mopatoo ang ubang mga garbage collectors. Maayo tingali kanila nga dili na sila renyohan sa ilang mga kontrata.
* * *
Angay na g’yod lagi nga hugtan na sa pagdili sa kagamhanan ang pagsul-ob niining mga sapot nga susama g’yod sa mga gipangsul-ob sa mga polis ug military.
Tan-awa og unsay nahitabo? Natulis ang usa ka bangko didto sa Lapulapu kay kompyansa kaayo ang gwardya kay ang mga tulisan nagsul-ob man og sapot nga mora’g military ug mora’g polis.
Ang Article 179 sa Revised Penal Code naglatid g’yod nga gidili ang pagamit og mga “insignia, uniforms” nga gigamit sa usa ka opisina nga ang nagsul-ob dili sakop.
Ang mga hukom sa Supreme Court nagkanayon “Such illegal use of uniforms or insignia may be preparatory to the commission of the crime of usurpation of authority, hence, it is punishable.”