Ang pagka-binunyagan

Ang kinaiya sa bunyag ni Juan Bautista ang naghagit sa mga katawhan sa iyang kapanahonan nga magbag-o ug mobiya sa ilang naandang kinabuhi sa pagpakasala. Mao kadtong mga giisip nga mga public sinners ang sa kinasingkasing nga paagi miduol sa bantugang Juan Magbubunyag aron pagtimaan sa ilang dakong tinguha nga maghinulsol gikan sa ilang pagpakasala. Sa dihang miduol si Jesu-Kristo aron magpabunyag, nagpasabot ba kini nga usa siya ka tawong masalaypon? Dili? Ang gibuhat sa atong Ginoo usa ka matang sa pagduyog sa kinaiyang tawhanon nga gihulagway nga makasasala aron pinaagi sa maong pagduyog ang may kamatayon nga tawo ang kahatagan sa walay kamatayon nga dignidad sa kang Kristong pagka-Diyos.

Ang pulong Bautismo ang nagagikan sa Griyegong pulong “Baptismos” nga nagkahulogan og Immersion kon pagtunlob. Tabunok kaayo kining maong termino kun ipasikad nato kini sa teolohiya ni Apostol Pablo. Nga ang bunyag diay usa ka paagi diin gilubong ang atong daang pagkatawo sa sala aron mahimo kitang bag-ong mga binuhat diha sa kang Kristo. Namatay kita uban ni Kristo, mabanhaw kita uban Kaniya! Kun ang giagiang bunyag sa atong Ginoo, mao ang nagtimaan sa iyang Public Ministry, ang atong Bunyag usab mao ang nagtimaan sa sinugdanan sa atong Panaw uban kang Kristo ug sa iyang simbahan. Ang atong pag-ambit sa iyang kinaiya ingon nga Pari, Propeta ug Hari ang wala lang magpasabot og paghisakop sa iyang Lawas Mistiko kondili, nagpasabot usab kini og pagpuyo ingon sa angay sa mga panaad sa bunyag nga gibungat nato matag karon ug unya. Dili lamang kini kutob sa ngalan lamang kondili naglakip pud kini sa buhat.