Sex slaves!

Unsa man ning sex slaves? Literally speaking, ang paghimog ulipon sa mga babaye aron mahimong gamitonon sa mga lalake. Ug tungod kay slaves, sa ato pa, wa na man untay slavery karon, napugos sila, o gipugos nga mahimong slaves.

Mao kini karon ang nahitabo sa pipila natong kaigsoonang kababayen-an, mga inosente intawon, mga batan-on pa kaayo, nga gumikan sa kawad-on, gumikan sa walay klarong kapanginabuhian sa atong nasud, napugos paglangyaw ug nabiktima sa walay puangod nga mga recruiter – nahimong mga sex slaves. Supak unta sa ilang kabubut-on, apan under the circumstance, wa na silay nahimo. Luoy kaayo.

Ambut kanus-a muabot ang panahon nga moingon ang atong gobiyerno nga: Uy Pinoy, ayaw nag layas, ayaw nag abroad, ikaw nurse, ikaw doctor, ikaw seaman, ikaw engineer, ikaw teacher – ayaw nag pangambisyon nga maka-dolyar tungod kay mabuhi namo dinhi sa atong nasud ug makapuyo na decently.

Mahitabo kaha ni dinhi sa atong nasud, Dro?

Si Vice President Noli de Casto, ang gihimong presidential adviser on OFWs, nakadawat nag daghang mga reklamo batok sa mga recruiter nga maoy responsible sa human trafficking sa atong nasud.

Maoy sugilon sa mga biktima nga kono gisaaran silag mga desenting trabaho, apan pag-abot nila sa ilang destination, gihimo silang mga sex slaves, gibilanggo sulod sa usa ka building, dili makagawas. Naghuwat sa mga customer. Helpless kaayo. Wa na silay mahimo.

Maayo man gani kay ang uban kanila, nakahigayon rag ikyas. Ug midangop sila kang Noli, aron kapasakaan og kiha ang recruiter nga nag-among-among sa ilang dungog ug sa ilang ugma. 

 Ila sad ning gihimo aron pag-warning sa uban aron dili mahisugamak sa nahitabo kanila. Illegal ang ilang pag-adto sa gawas, wala muagi sa POEA, busa, sayon silang nailad, ug wala silay nahimo. Igo na lang silang nagpatulo sa ilang mga luha, suma sa atong nakita sa telebisyon.

Mao nga mga Inday, kun kinahanglan mang mo-abroad, ipaagi sa legal nga paagi ang tanan, aron nga kun unsa may mahitabo, duna tay kadangpan, ug dili maglisud ang atong gobiyerno, pagtunol sa tabang.

In the meantime, ayaw himoang katarungan ang kawad-on nga himoon nimong pohunan ang imong aron mabuhi. O, katawa man ka, Dro!