Kalisud diha sa panimalay

Matud pa nila kun dunay mga lalaki nga magminyo ang panultihon sa mga nag-una kanila mao: “ANOTHER MAN GOES WRONG!” Kini tungod kay sa tinuoray lang dili sayon ang magminyo labaw na ang magpabiling makanunayon diha sa mga panaad sa pag-ugmad og usa ka Kristohanong Banay niining atong kapanahonan karon.Sanglit daghan ang mga hulga nga sagubangon sa matag banay masulod man o magawas.

Sa linghod nga panuigon sa atong Ginoo, nasinati na niya ang kakuyaw ug kalisdanan. Gipangita siya aron patyon sa hakog nga si Herodes. Tungod ning maong kahimtang, ang iyang mga ginikanan ang kinahanglang magpalayo ug manimuyo sa usa ka langyaw’ng nasud nga halayo ug lain ra kaayo kun itandi sa ilang kulturanhong kahimtang.

Kun ang atong Ginoo nga misinati sa maong kalisdanan, kita usab ning panahona ang nakasinati sa usa ka dakong kalisdanan. Laing pwersa ang migukod sa pamilya. Daghan ang mga banay nga naungkag tungod sa mga dili pagsinabtanay sa matag miyembro niini. Ang kulturanhong balansayon nga supak sa kinabuhi ang padayong mihulga sa kinaiya sa usa ka banay ingon nga salag sa kinabuhi. Tungod sa kalisud daghan ang mga naningkamot nga makasapi pinaagi sa paglangyaw. Ang nakapait kay daghan sa atong mga kabatan-onan ang buot na lang makigminyog langyaw aron mahaw-as sa kalisdanang pinansiyal. Nahimong praktikalan na lang ang pagsabot sa kaminyoon. Mosulod sa usa ka kasabuan dili aron mohigugma kondili aron magpakabuhi.

Atong iampo ang atong mga kabanayan karon nga unta magpabilin silang buhing timaan sa Diosnong Kahiusa ug Kasantos nga gisalamin sa Balaang Banay nila ni Jesus, Maria ug Jose.