Lakaran na naman ng mga posisyon sa gobyerno

NAGIGING mahigpitan na ang lakaran para makakakuha ng magagandang posisyon sa gobyerno. Masakit na raw ang ulo ni President Gloria Macapagal-Arroyo kung sinu-sino ang kanyang pipiliin upang pamunuan ang napakaraming ahensiya ng gobyerno maliban pa sa mga Gabinete at sa mga posisyon na nasa ilalim nito. Kanya-kanyang bulungan at close guarding daw ang ginagawa ng mga padrino sa Presidente upang ang kanilang mga bata ang ma-appoint sa ninanais na posisyon.

Kahit na raw may napili nang magaling at well-qualified na ang recruitment panel ng Malacañang, napupur­nada pa raw ito at nasisingitan ng bata ng isang implu­wensiyal na pulitiko o kaya ng isang malakas na supporter na mahirap na mahindian ng Palasyo. Kung agawan ng posisyon para sa kani-kanilang mga bataan ang pag-uusapan, wala nang pinakamadugo kundi ang lakaran sa Gabinete at iba pang mga matataas na posisyon sa pamahalaan.

Ito ang dahilan kung bakit mahirap na asahan na tala­gang piling-pili lamang na magagaling at pinakama­huhusay lamang ang dapat na magsilbi sa gobyerno. Ang nangyayari, palakasan, suhulan at pambayad-utang ang nagiging batayan ng pagpili ng mga humahawak ng mga mahahalaga at sensitibong posisyon sa pamahalaan na dapat sana ay mga taong may dangal at may mga nata­tanging talino at pambihirang kaalaman sa posisyon na dapat nilang hawakan.

Hindi ko alam kung anong mga klase ang mga pipiliin ni GMA upang humawak ng iba’t ibang posisyon sa gobyerno. Nabalita pa noon na bubuo pa raw ang Presi­dente ng isang special panel na mamimili ng mga karapat-dapat na mga opisyal na kukunin ng Presidente upang humawak ng mga posisyon sa pamahalaan. Isa sa mga hahanapin ng panel ay ang papalit kay Comelec chairman Benjamin Abalos.

Para sa akin, ang ma­halaga ay ang sin­seridad ng Presidente na magsilbi sa bayan ayon sa pina­numpaan niya. Sundin lamang ni President Arroyo ang kanyang Oath of Office. Nakakasiguro akong huhusay ang takbo ng ating bansa sapagkat susun­din din ng mga nasa ibaba ang nakikita nilang gina­gawa ng Presidente. Sana nga sa pagbabago ng mga tauhan ng gobyerno ay maba­bago na rin ang mga dating gawi at kaugalian at palitan ang mga ito nang magaga­ling at magagan­dang gawain ng mga namu­muno na magsisilbing bagong halim­bawa    para sa lahat.