Walay rehistro ug lisensiya

Usa ka magbabasa ning pinobre tang lindog mi-text nga nagkanayon: “Sir, good PM. Alang sa LTO ning akong reklamo kay ang mga habal-habal nga motor diri sa eskina Pakigne, Minglanilla padulong sa Tubod Flowing Water walay rehistro ug walay lisensiya ang mga driver. Nag-checkpoint tuod ang mga taga LTO pero wala kasakop kay didto man sila nag-checkpoint sa bridge sa Pakigne. Angay unta sa may nag-parking nga mga motor.”--0920-5107185 (Sent: 02:16:51pm--Oct. 25, 2007)

Mao tingaling sa bridge sa Pakigne gibutang ang checkpoint kay dili man lang ang mga motor nga habal-habal maoy tuyo sa nag-checkpoint kundili ang tanang mga sakyanan nga nakalapas og bisan unsang lagda sa balaod. Salamat sa impormasyon nga gihatag sa atong texter kay kini makatabang paggiya sa mga tigpatuman sa balaod sa ilang paggukod niadtong mga malapason.

Manghinaot tang hatagan og pagtagad sa proper authorities kanang mga habal-habal sa Pakigne, Minglanilla nga mobiyahe ngadto sa Tubod Flowing Water nga walay rehistro ug ang mga driver wala pod ing lisensiya. Pastilan, dobleng violation kini. Angay gyod pakgangon kining maong mga tawo ug patubagon sa ilang kalapasan.

* * *

“Sir, good AM. Ngano man nga until now naa man gihapoy extension seat ang mga jeep especially kanang rota paingon sa MEPZ ug Opon. Asa ra man ang taga LTO? Piot kaayo sa sulod sa jeep, dili na ta hapit makaginhawa.”--0916-2846295 (Sent: 09:26:29am--Oct 25, 2007)

Tinuod nga makahatag gyod og inconvenience sa mga pasahero kanang extension seat nga ibutang sa tunga sa sakyanan. Labina kanang mga sakyanan nga mobiyahe sa MEPZ ug Opon nga mga gagmay nga multicab. Ambot nganong wala gyod kini hunahunaa sa mga driver. O wala na gyod sila magbaton og kaikog ngadto sa mga pasahero.

Tungod sa pagpangiyawat nga mokita og dako sa pagpamasahero maong ila kining gihimo. Pero kun nakapuwerhisyo kini sa mga sumasakay, dili kini angay padayonon. Maayo unta kun mapitol sila sa proper authorities.

(Sumbong ug reklamo? Text sa 0910-8105522).