Mga bayaning alaot

Ang paglampos ni Pres. Arroyo pagkumbinser sa Emir sa Kuwait pagpakubos sa silot nga kamatayon ni Marilou Ranario ngadto na lang sa pagkapriso dako nang kadaogan. Labi na atubangan sa napakyas nga mga pagsuway sa nangaging duha na ka tuig nilang Bise Presidente Noli de Castro ug ubang mga opisyal pagpalingkawas ni Ranario gikan sa bilanggoan. Igo na ning ikawara-wara ni Arroyo sa iyang pagbalik sa nasud, taliwa sa sibaw nga mga pasangil nga junket ang iyang pagtangkil sa daghang mga kongresista ug mga senador ngadto sa Uropa, pagpasalig sa OFWs nga, isip bag-ong mga bayani, di sila talikdan sa kagamhanan, nga mapasalamaton kaayo sa dako nilang tampo pagpalambo sa nasudnong ekonomiya, sa panahon sa ilang labing mahinungdanong mga panginahanglan ug labing dinaliang mga pagsuway.

* * *

Apan ang kapakyas ni Arroyo pagkuha sa gipangandoy nga Royal Pardon, nga mao untay hingpit nga makalingkawas ni Ranario, di makapapas sa pagduda nga inutil ang kagamhanan sa pagpanalipod sa OFWs nga ilang gidasig nga mobiya sa ilang mga pamilya aron manghagdaw og dolyar gikan sa langyaw’ng kabaybayonan. Di katabang sa kawsa sa kagamhanan ang kalehitimo sa mga pasangil nga duna pay daghang OFWs sa tungatungang sidlakan ug ubang bahin sa kalibotan nga, sama ni Ranario, nag-atubang sab og silot sa kamatayon nga, lahi ni Ranario, wa matabangi sa kagamhanan. Lisod lalison ang mga pasangil nga molihok lang ang kagamhanan sa mga kaso sama nilang Flor Contemplacion ug Ranario nga mahugyaw nang tibuok nasud.

* * *

Samtang nagkadako ang amot sa OFWs ngadto sa nasudnong ekonomiya, magkakusog sang awhag nga tinud-on sa kagamhanan ang iyang pag-ila sa OFWs nga bag-ong mga bayani. Way mga bayani nga ilawog lang sa mga langyaw’ng agawon sukwahi sa mga kontrata nga ilang gipirmahan. Labaw nang way mga bayani nga pasagdan lang lubaon, nga wa pa gani kahigayonan nga igkita ang mga patay’ng lawas sa nagbangotan nilang mga kadugo dinhi sa ato.

* * *

Inay magsaulog sa paglingkawas ni Ranario gikan sa silot nga kamatayon, si Pres. Arroyo angay’ng molusad og matinud-anong pakisusi unsay nakatukmod nilang Ranario ug ubang OFWs paglayat ngadto sa ataon nga bung-aw sa krimen. Pait ba gyod kaayong ilang kahimtang nga pag-utang na lag kinabuhi ang ilang dag-anan? Si Ranario, sa wa pa mahitumpawak sa Kuwait, magtutudlo sa Surigao. Tigtudlo sa maayong mga mithi ngadto sa linghod nga mga tinun-an. Siyay nagmaymay nila unsaon paglikay ang duguong kalibotan sa pag-utang og kinabuhi. Unsa may nahitabo niya? Unsa mang hampaka sa daotang hangin nga kalit nga nakausab sa iyang bayhon gikan sa pagka-aghop nga tigsagakay sa mga bata ngadto sa pagka-mangtas nga mamumuno. Pagpatay na ba lay nahibiling paagi pagpanalipod sa iyang kaugalingon?.

* * *

Email: [email protected]