Idiretso sa drainage

Usa ka magbabasa ning lindog mi-text nga nagkanayon: “Naa koy reklamo kabahin ining mga metro aid sa Talisay City. Ang ilang mga gipangsilhig nga sagbot idiretso ra nilag balhog sa drainage sa daplin sa dalan. Mao nang sa panahon nga mag-ulan magbaha gyud na diha dapit sa may PLDT duol sa F. Mall.” -- 0921-3020865 (Sent: 03:01:00pm--November 10, 2007)

Kun tinuod man ugaling kining imong pasangil, higalang texter, matawag nga i-responsable ang mga metro aid nga naghimo sa ingon. Imbes nga hawanan pa man gani nato ang mga drainage aron dili magbara, ato na hinuong tam-okan sa mga sagbot? Nayabag na! Diin god intawon sila makakat-on sa maong pamaagi?

Ang angay buhaton mao nga hiposon ang sinilhig nilang mga sagbot aron dili na kini mahimong hinungdan sa kahasol sa umaabot nga mga adlaw. Dili kay itam-ok na hinuon sa drainage kay seguradong makabara gayod kini sa tubig. Dili maayong paumhan lang nila ang katapol kay puwerhisyo ra gihapon ang sangkoan sa ilang gibuhat.

* * *

Good PM, Sir. Puyde mangayo ko og number sa NSO? Salamat.” -- 0918-4853778 (Sent:12:22:52pm--November 10, 2007)

Sulayig contact ang (02) 737-1111.

* * *

“Good day, Sir. Thanks kaayo nga wa na koy nakitang manuyopay og rugby ilawom sa Opon Public Market. Unta magpadayon na kini. Thanks also sa mga awtoridad.” -- 0917-9993467 (sent: 09:37:27am--November 10, 2007)

Daghang salamat usab sa kasayoran nga imong gihatag, higalang texter. Sama nimo, nanghinaot sab ko nga magpadayon na ang kahusay ug kalinaw diha sa dapit nga imong nahisgotan ug dili na gayod mopatim-aw ang mga manuyopay og rugby.

Kun unsa man ang imong maobserbahan sa umaabot nga mga adlaw nga morag dili maayong pasagdan lang, ayaw pagpanuko sa pagtaho dinhi sa atong lindog. Isip usa ka agony column, andam ta kanunay paghatag og pagtagad sa inyong mga yangungo.

* * *

 (Sumbong ug reklamo? Text sa 0910-8105522).