Dalaygon si PO3 Lumayag

Angayan lamang nga ikiha si PO1 Luther Lapinig tungod sa iyang pagbutho sa dalan Garfield, Pahina San Nicolas aron sa paglaban sa iyang manghod nga nakakita og away ug nakigpinusilay sa polis nga miresponde sa alarma.

Si PO3 Inocencio Lumayag igo lang nagtubag sa alarma, apan gikapinusilay na hinuon ni PO1 Lapinig nga makalilisang ang porma nga mibutho sa Garfield nga nag-short pants, nagsinena og pinutol ug naka-tsinelas lamang nga nagbitbit og armas.

Ambot og nasayod ba si PO1 Lapinig nga anaa siya sa hurisdiksiyon sa Cebu City Police Office (CCPO) nga nagbaklay ra man kini nga nagbitbit og armas nga miadto sa lugar diin nakakita og away ang iyang manghod.

Kang Insp. Mario Monilar pa, kun maayong polis pa si PO1 Lapinig ug naghunahuna siya sa tukmang proseso, nakig-coordinate unta kini sa labing duol nga police station aron mapakgang ang panag-away tali sa mga batan-on sa maong lugar ug sa iyang manghod.

Kun tinuod ang akong nadunggan, gikumkom diay ni PO1 Lapinig sa iyang mga kamot ang balaod. Tiaw mo nang nagsud-ong lamang siya sa iyang manghod samtang mikulata kini sa gikaaway niini.

Si PO3 Lumayag nga nagpuyo sa maong lugar igo lang gidangpan sa mga silingan nga nakamatngon nga miinit na pag-ayo ang sitwasyon tungod sa presensiya sa batan-on nga armado nga nagsul-ob lamang og short pants, pinutol nga sinena, ug naka-tsinelas.

Sa bahin ni PO3 Lumayag, igo na kaayo ang iyang pagpaila nga polis sa dihang miresponde sa alarma. Makapasar na kana sa tukmang paagi pagtubag og alarma, bisan naka-sibilyan lamang si PO3 Lumayag.

Mas manubag pa hinuon si PO3 Lumayag kun wala siya motubag sa alarma tungod lagi kay off duty siya. Angay pa gani hatagan og commendation si PO3 Lumayag tungod sa iyang pagpakigharong ni PO1 Lapinig bisan off duty siya.

Risgo kaayo ang pagtubag ni PO3 Lumayag. Siya pa ang giunhan og pusil ni PO1 Lapinig, bisan sa pagpaila nga polis.

* * *

HAMBOG. Wala ba kamo makabantay sa batasan sa mga PO1 karon?

Angayang i-review sa National Police Commission ug Philippine National Police ang selection process sa mga polis. Daghan na kaayong kaso nga naglambigit og mga barumbado nga mga PO1 ug PO2.

Timailhan kini nga adunay nakalusot sa selection sa Napolcom ug PNP nga dili unta angayan sa serbisyo.

Gamay ra man tuod kini sila, apan nakadamay sa daghang PO1 ug PO2 nga nagtinarong sa ilang pagka-polis.

Kanang wala magtinarong mao kanay angayang hinayhinayan og papha, ilabi na kanang mangilkil sa ilang mga dinakpan ug kanang mag-rambo kun makakita og away ang igsuon!

* * *

TORO-TORO. Migawas na usab ang taho nga uso sa dakbayan sa Mandaue ang “toro-toro” kun live show sa mga batan-ong lalaki ug babaye nga mag-sex atubangan sa mga kustomer sa bar.

Seryoso kini nga taho nga angayang hatagan og pagtagad sa local nga kagamhanan sa dakbayan sa Mandaue.

Apan taym pa. Dili ba kaniadto ra man kini nga adunay report nga adunay mga live show sa paresan nga mag-sex atubangan sa daghang mga kustomer?

Kun mao na, wala gyud kini masumpo.

Kun midaghan, sa ato pa, wala diay kini hatagi og pagtagad sa local nga kagamhanan sa dakbayan.

Ambot og aduna bay local indecency board ang Mandaue city.

Kay ang abtik kaayong mang-ronda niini mao man ang Cebu City Anti-Indecency Board (CCAIB) nga gidumala sa akong higala nga si Dr. Rene Josef Bullecer.

Pastilan, wala na gyuy lingaw kining mga tagdumala og mga night bar sa Mandaue. Aron lang mahalin ilang beer ug makadako sa ganansiya, modangop na lang og ingon niining klaseng kalihukan sulod sa ilang bar.

* * *

CITOM. Hain naman kining mga sakop sa City Traffic Operations and Management?

Daghang mga karsada ning dakbayan nga hasion og bagang-duot sa trapiko, pero wala gyud kitay makit-an bisan usa ka traffic enforcer.

Sama pananglit sa Osmeña boulevard ug sa dalan Legaspi matag Biyernes, hilabihan kahuot sa trapiko anang lugara, pero wala gyud kitay makit-ang traffic enforcer nga nagmando sa trapiko.

Asa naman diay ang minilyon nga kita sa Citom?

Nagkadako hinuon ang kita sa Citom, nagkagamay na hinuon ang traffic enforcer. O adunay mga traffic enforcers pero nanapol lang og sunod sa oras sa ilang trabaho ug walay nagtagad og pangpangulo nila kay dili na estrikto ang nagdumala karon sa Citom.

Maayo pa man hinuon sa panahon kaniadto ni Bobit Avila, bisan asa ka nga eskina, may traffic enforcer nga nagbarog.

Karon, wala na hinuon.