Pinaskohan sa Oktubre

Una gibulgar sa wa magpaila nga duha ka kongresista nga nakadawat sila og kuwarta gikan sa Malakanyang og ila kining nadawat sa dihang gipatawag sila sa Presidente kaniadtong miaging Huwebes kun sumad karon. Ang usa miangkon nga nakadawat siya og tunga sa milyon samtang ang usa miingon nga nakadawat siya og dos siyentos mil ka pesos. Dinhi sa ato si kongresista Tony Cuenco miangkon usab nga nakadawat siya og dos siyentos mil ka pesos nga pinaskohan gikan sa Malakanyang apan walo ka oras human sa iyang pag-angkon, iya kining gibakwi ug misulti nga nagkomedya lamang siya atol sa iyang interview.

Si deputy speaker Raul del Mar hugot nga nanghimakak sa giingong kuwarta nga gipanghatag atol sa gipatawag nga tigom sa Malakanyang. Apan ang pamakak ni del Mar ug mga kaubanan gisopalpal sa paring gobernador sa Pampanga nga si Ed Panlilio human kini mobulgar ug mipakita ngadto sa publiko sa tunga sa milyon nga iyang nadawat gikan sa Malakanyang human sa ilang tigom kaniadto gihapong miaging Huwebes. Misunod usab sa pag-angkon si Bulakan Governor Jun jun Mendoza nga nakadawat siya og tunga sa milyon, Gobernador Emilio Macias sa Negros Oriental nga nakadawat og dos siyentos mil ka pesos ug Baguio City Congressman Mauricio Domogan nga nakadawat usab og susama gihapong kantidad.

Sa mga kongresista dunay nangangkon, duna usay wala, ug ang mga nangangkon lain-lain og rason sa ilang pag-angkon sa nadawat nilang kuwarta. Ug kay managlahi man ang ilang mga rason sa pag-angkon nagpasabot lamang kini nga bakak ang ilang mga gipanulti. Pero kun namakak man ang mga nangangkon nga nakadawat sila og kuwarta, mas labing bakakon ang mga wa mangangkon ug pinakabakakon sa tanang mga bakakon ug kingkoy pa gayod ang kongresista nga mibakwi sa iyang pag-angkon.

Sa mga Gobernador sila si Panlilio, Mendoza ug Macias lamang ang nangangkon, ang uban padayon pang nagpakahilom.

Bisan sa pag-angkon na sa pipila ka mga kongresista ug mga gobernador nga nakadawat og sayong pinaskohan gikan sa Malakanyang, ang naulahi padayon gihapon kining nanghonaw ug wa moangkon nga gikan kanila ang maong dagkong kantidad sa salapi nga nadawat sa mga nanambong sa tigom. Apan bisan og unsaon pa sa pagbali-bali sa Malakanyang ang ilang pagpamakak, di na nila matuis pa ug matabonan ang buhing kamatuoran nga ilang gisubornohan ang mga kongresista ug mga gobernador ug ubang mga lokal nga opisyal agi og pagpangandam aron dili gayod makalusot ang impeachment complaint nga gipasaka batok sa presidente. Huyang man ang impeachment nga gipasaka batok kaniya, apan segurista lang ang Presidente. Mao kini ang hinungdan kun nganong bisan layo pa kaayo ang pasko, nanghatag na og pinaskohan si Presidente Gloria Macapagal Arroyo.