Sobre kuno

Ang tag-iya sa cellphone number 0928-6204904  mi-text kanako ug nagpahibalo nga sa ilang dapit (sakop sa dakbayan sa Sugbu ra) adunay mga bata nga nagsuroysuroy ug nanungko sa kabalayan. Manghatag kunog sobre nga pasudlan og kuwarta. Dunay kaubang babaye ang maong mga bata nga magsunod lang sa igong gilay-on.

Nagtuo ko nga usa na pod kini ka estilo sa modus operandi sa mga badlongon sa katilingban ug ang mga bata maoy gihimo nilang instrumento sa pagpasalir sa ilang tinonto. Kun tinuod nga adunay kuyog nga babaye nga hingkod nag pangedaron ang maong mga bata, nganong dili man siya’y nangunay na lang pagpanghatag sa mga sobreng ilang dala ngadto sa mga tagbalay sa kabalayan nga ilang sungkoon? Nganong ang mga bata man maoy iyang ipaon-paon?

Pagbantay kamo niini. Kun adunay manungko sa inyong balay nga susama niinig estilo, sutaa una kun unsa nga organisasyon ang nagsugo nila pagpanghatag og sobre nga pasudlan og kuwarta. Sa laktod, seguroa nga lehitimo ang ilang pagpangolektag donasyon o unsa pa diha, aron matino nga dili mahulog sa pribadong bolsa ang kuwarta nga inyong ihatag. Kun dunay address nga nabutang sa sobre o ba kaha telepono sa buhatan sa organisasyon nga “nagsugo” sa mga bata, tawgi kini aron masuta ang tinuod.

* * *

Sa laing bahin: “Good day, Sir. Kining ako dili reklamo kondili pagdayeg kini sa usa ka kugihan nga CITOM officer. Naa siya na-assign sa Mambaling eskina paingon sa SRP. Grabe gyud siya ka kugihan. Mag-agas god ang iyang singot pirme inig agi nako. Loyal ug honest gyud siya sa serbisyo. Dili pareho nianang uban nga CITOM nga mag-atang lang sa dakponon, sige’g palandong, bahalag trapik na kaayo. Suwayi gani’g agi diha mga alas 7 sa buntag, makita nimo ang maong CITOM ug makadayeg ka gyud niya.” -- 0921-4750613 (Sent: 01:51:28pm-- October 4, 2007)

Dalaygon tuod ang maong CITOM officer kay nagtuman man gyud siya sa iyang katungdanan. Ang sama niya maoy atong gikinahanglan. Hinaot unta nga ang iyang kakugi ug kaligdong manakod sa iyang mga kauban. Mosaludo sab ko sa maong CITOM officer bisan wala ko makaila niya. Kana maoy officer sa CITOM!

(Sumbong ug reklamo? Text sa 0910-8105522).